Москва, 18 септември 2024 (МИА) - Рускиот активист Владимир Кара-Мурза одмавна со главата во неверување додека им се обраќаше на пратениците и дипломатите во сослушувањето во американскиот Сенат, само неколку недели откако беше ослободен од сибирскиот затвор во големата размена на затвореници.

-Зборот надреално не е ни приближно да го опише тоа што го чувствувам во моментов, рече дисидентот на настанот, чија цел беше да го истакне тоа што присутните го опишаа како страдање на стотици затвореници кои сè уште се држат во Русија поради нивните политички убедувања. 

Истовремено со посетата на Кара-Мурза, демократскиот сенатор Бен Кардин, кој претседава со Комитетот за надворешни односи на Сенатот, оваа недела ќе воведе закон со цел да ги заштити Русите и Белорусите кои работат на поддршка на демократијата во нивните матични земји.

Законот, меѓу другото, ќе одобри финансирање за поддршка на независните медиуми и граѓанското општество во Русија, Источна Европа и Централна Азија, како и поддршка на низа акции за поддршка на дисидентите кои живеат надвор од нивните земји.

Кара-Мурза беше ослободен со размена на затвореници на 1 август, откако рускиот суд претходно го осуди на 25 години затвор за предавство затоа што изјави дека владата на рускиот претседател Владимир Путин бомбардирала домови, болници и училишта во Украина.

Неговото ослободување следеше по повеќемесечната кампања која вклучуваше пишување писма од членовите на Конгресот и усвојување на резолуција со која се бараше негово ослободување.

-Што и да ви кажат циниците и скептиците, застапувањето функционира, вниманието на јавноста штити, вниманието на јавноста спасува, рече Кара-Мурза. мс/

фото: ЕПА