Скопје, 20 февруари 2023 (МИА) - Во Центарот за обука на Секторот на посебните полициски единици во подгоричката населба Златица од 13 до 22 февруари, се одржува заедничка обука на припадници на Посебните полициски единици (ПЈП) од Црна Гора и Единицата за брзо распоредување (ЕБР) на македонската полиција, од областа на воспоставување и одржување на јавниот ред мир за време на нереди и демонстрации од поголеми размери.

- Земајќи го предвид искуството на Единицата за брзо распоредување во наведената област, целта на обуката е размена на искуства помеѓу двете единици како понатамошно засилување на вкупните капацитети и нивоа на обученост на Посебните единици во извршувањето на наменските задачи, истакнуваат од Министерството за внатрешни работи на Црна Гора.

 

 

Посебните полициски единици на Црна Гора заедно со припадниците на ЕБР, соопштија денеска од МВР, вежбаат различни оперативно-тактички постапки и формациски делувања на полицијата при воспоставување и одржување на јавниот ред и мир за време на поголеми нереди, обезбедување на јавни собири и спортски манифестации од висок безбедносен ризик.

 

Од Министерството за внатрешни работи на Црна Гора потенцираат дека земајќи ја предвид важноста на процесот на обучување и унапредување на тактиките на специјалните единици на полицијата, во одговор на различни кризни ситуации, соработката со Единицата за брзо распоредување на македонската полиција е во насока на реализација на определбата за континуирана соработка со најреномираните регионални и светски единици на полицијата. цр/сп/