Заедници во Канада ја откажуваат прославата на националниот празник по откривањето посмртни остатоци на домородни деца
Отава, 30 јуни 2021 (МИА) - По откривањето стотици тела во необележани гробници во поранешните училишта за домородни деца, заедниците ширум Канада ги откажуваат или менуваат плановите за славење на Денот на Канада, зголемувајќи го притисокот врз премиерот Џастин Трудо да ги откаже националните прослави.
Во вторникот се одржа комеморација за 751 дете чии посмртни остатоци беа пронајдени на местото на некогашниот црковен интернат, пренесува Њујорк Тајмс.
Вкупно 139 црковни интернати во Канада, отворени од Католичката црква во 1800-тите во име на канадската влада, беа места каде што повеќе од 150.000 домородни деца беа присилно однесени од нивните семејства.
Последното вакво училиште беше затворено во 1997 година.
- Одбележувањето на Денот на Канада се смета за неважно за сите животи што ги изгубија децата и ги охрабруваме сите да размислат за цената што овие деца мораа да ја платат од канадската влада, рече Боби Камерон, лидер на Федерацијата на суверени домородни народи во Саскачеван.
Денот на Канада се слави секоја година на 1 јули, се однесува на настаните од 1867 година, кога трите британски колонии се обединија и ја формираа Канада.
Многу домородци никогаш не го прославиле Денот на Канада и го гледаат канадското државјанство како нешто што им е наметнато. Сепак, други активно учествувале во прославите во минатото. паг/
