Битола, 22 февруари 2022 (МИА) - Ракометарите на Еурофарм Пелистер го совладаа Кадетен од Шафхаузен со 27:26, полувреме 15:12. Одземајќи им три од вкупно четири бодови во двата натпревара, битолчани потврдија дека во моментов се подобар тим од швајцарскиот претставник во европската ракометна лига. Вечерашната средба во спортската сала „Боро Чурлевски“ беше одбележана со постојано водство на домашната екипа и без можности за непријатно изненадување, затоа што гостите ниту во еден момент од мечот немаа водство. Во првото полувреме, благодарение на ефикасноста на Мандалиниќ, Периќ и Радовиќ, битолчани обезбедија предност од 15:12, а нивната ефикасност беше главен фактор за конечната победа од 27:26 која иако е со тесен резултат сепак е повеќе од заслужена. Статистички најефикасни на средбата беа Периќ, кој постигна седум, и Табоада со шест постигнати голови, додека, во гостинскиот тим се истакна Зендер кој шест пати го погоди голот на Шекељи. Со оваа победа тимот на Еурофарм Пелистер ја зацврсти втората позиција на табелата и е со реални амбиции за првото место, имајќи предвид дека вечерва во Атина, домашниот АЕК го совлада лидерот Ним со 34:30 со што разликата меѓу францускиот и македонскиот вицешампион е само еден бод. мт/ар/