Скопје, 11 април 2025 (МИА) - Сто и педесет училишта во државава во моментов имаат едносменска настава, информираше денеска ресорната министерка Весна Јаневска. Едносменската настава и продолжен престој на ученици и на наставници во училиштата е мерка на МОН што се спроведува како суштински предуслов за поквалитетно образование.

Воведувањето едносменска настава е поврзана со процесот за оптимизација на училишната мрежа односно затворање на подрачни училишта во рурални средини кои имаат само неколку ученици и нивно префрлање, заедно со кадарот, во централни училишта. За таа цел се потребни просторни услови - доградба на училници, но и на училишни објекти кога се работи за големи урбани општини. 

Во обраќање на економски  форум што денеска го организираше Finance Think – Институт за економски истражувања и политики, министерката Јаневска рече дека согласно направената анализа на МОН и Светска банка за воведување работа во една смена во сите училишта, потребно е да се доградат 300 училници и 70 санитарни јазли, што е инвестиција од околу 8 милиони евра.

-Ако учениците поминуваат повеќе часови на училиште, време што нема да биде исполнето само со класично учење, туку и со воннаставни активности кои значат стекнување нови знаења и вештини, тоа значи дека учениците добиваат повеќе време да се посветат на своите интереси и личниот развој. Дополнително, едносменската настава придонесува за создавање еднакви можности за сите ученици, овозможувајќи подеднаква достапност до образовните ресурси и активности, укажа министерката Јаневска. хс/ац/

Фото: МОН