Дебарските гимназијалци премиерно ја изведоа „Госпоѓа министерка“
- Во концертната сала на Центарот за култура – Дебар дебарските гимназијалци премиерно ја изведоа претставата „Госпоѓа министерка“ од авторот Бранислав Нушиќ а во режија на професорот Џевит Миф
![Дебарските гимназијалци премиерно ја изведоа „Госпоѓа министерка“](https://mia.mk/index.php/images/20221113124641_big_730x400_9.webp )
Дебар, 6 мај 2022 (МИА) – Во концертната сала на Центарот за култура – Дебар дебарските гимназијалци премиерно ја изведоа претставата „Госпоѓа министерка“ од авторот Бранислав Нушиќ а во режија на професорот Џевит Мифтароски.
Пред многубројната публика се обрати директорот на Центарот, Зинче Мимидиноски, кој истакна дека оваа претстава е дел од годишната програма за работа на Центар за култура-Дебар за 2022 година од областа на драмската дејност.
Се обрати и директорот на дебарската гимназија „28 Ноември“ Рамадан Имери кој рече дека двете установи секогаш имале плодна и успешна соработка.
„Госпоѓа Министерка“ вели режисерот Мифтароски е комедија која нема рок на траење, една од вечните теми во книжевноста, а Бранислав Нушиќ со своите дела е секогаш во мода.
-Навистина сум горд и ме прави да се чувствувам среќно и исполнето, посебно, што во сите досегашни претстави глумеле, а и сè уште глумат млади од различни етнички и религиски групи, со што се докажува дека Дебар и дебрани отсекогаш биле и сè уште се пример за соживот, почит, и соработка меѓу себе, изјави за МИА, Мифтароски, кому ова му е единаесетта претстава.
Задоволство е, додава тој, да се работи со младите актери, заради нивната посветеност, љубов кон уметноста и желбата за докажување и покажување на својот талент пред публика.
Задоволството од изведбата не го криеше и присутната публика, од Дебар како и подрачјето на Река, општина Маврово и Ростуше.
Таа со бурен аплауз ги награди Сара Куртовска (Живка министерка) Христијан Јаковлевски (Чедо) Азрета Перо (Дара), Анес Фазлиоски (Перо писар), како и другите актери и се разбира нивниот професор и режисер, Мифтароски. вт/ки/
![Дебарските гимназијалци премиерно ја изведоа „Госпоѓа министерка“](/articles/images/%d0%b4%d0%b5%d0%b1%d0%b0%d1%80%d1%81%d0%ba%d0%b8%d1%82%d0%b5-%d0%b3%d0/4cIOgZct2/placeholder.webp?use_watermark=0)
![Дебарските гимназијалци премиерно ја изведоа „Госпоѓа министерка“](/articles/images/%d0%b4%d0%b5%d0%b1%d0%b0%d1%80%d1%81%d0%ba%d0%b8%d1%82%d0%b5-%d0%b3%d0/LeZpKnMzn/placeholder.webp?use_watermark=0)