Гундоган стави крај на репрезентативната кариера во дресот на Германија
- Илкај Гундоган ја предводеше германската фудбалска репрезентација на овогодинешното Европско првенство во таа земја, што се покажа како негов проштален турнир во дресот на „панцирите“, откако денеска објави дека повеќе не е дел од националниот тим.
![Гундоган стави крај на репрезентативната кариера во дресот на Германија](https://mia.mk/index.php/images/20240819212151_big_730x400_87.webp )
Берлин, 19 август 2024 (МИА) - Илкај Гундоган ја предводеше германската фудбалска репрезентација на овогодинешното Европско првенство во таа земја, што се покажа како негов проштален турнир во дресот на „панцирите“, откако денеска објави дека повеќе не е дел од националниот тим.
Чекајќи да види каде ќе ја продолжи клупската кариера, незадоволен од идниот статус во Барселона, искусниот играч за врска реши да затвори едно поглавје од својот професионален живот и за тоа ја информираше јавноста преку својот профил на мрежата Х.
-По неколку недели размислување, донесов одлука дека е време да ја завршам мојата меѓународна кариера. Со голема гордост се навраќам наназад на 82 натпревари за мојата земја, бројка што никогаш не можев да ја замислам кога дебитирав за сениорската репрезентација во 2011. Мојот врв очигледно беше што успеав да ја предводам екипата како капитен на ЕП“, стои во објавата на сега веќе поранешниот капитен на „панцирите“, кој ја разочара нацијата со своите настапи на ЕУРО 2024.
Триесет и тригодишниот Гундоган дебитираше за Германија пред точно 13 години, но поради повреда не беше дел од тимот кој стана светски шампион во 2014 година на Светското првенство во Бразил. На 82 натпревари за Германија, поранешниот ас на Манчестер Сити постигна 19 голови. дс
Фото: Архива