Група на граѓани се собраа пред Кривичен со поддршка за Жан Митрев
- Пред Основниот кривичен суд Скопје, денеска се собра група на граѓани во знак на поддршка и апел за правда на обвинетиот Жан Митрев, непосредно пред почетокот на насроченото рочиште.
![Група на граѓани се собраа пред Кривичен со поддршка за Жан Митрев](https://mia.mk/index.php/images/20230512100939_big_730x400_31.webp )
Скопје, 12 мај 2023 (МИА) - Пред Основниот кривичен суд Скопје, денеска се собра група на граѓани во знак на поддршка и апел за правда на обвинетиот Жан Митрев, непосредно пред почетокот на насроченото рочиште.
Основното јавно обвинителство – Скопје поднесе обвинителен акт против доктор Жан Митрев, како физичко лице и Обвинителен предлог против неговата болница, како правно лице, за продолжено кривично дело „измама“ од член 247 од Кривичниот законик.
Предметот е оформен по допрен глас, откако ИРЛ минатата година го објави документарец „Нечиста крв“, во кој обелодени дека приватната болница „Жан Митрев“ им наплаќала на пациенти високи суми на пари за хемофилитрација при лекување од Ковид-19, по што беше отворен и предметот во ОЈО Скопје.
Како што информираа од ОЈО Скопје за овој предмет, не станува збор за „измама на пациенти“, односно совесноста и несовесноста на лекувањето не е предмет на ова кривично дело, туку за класична измама, односно прикривање на клучни факти во однос на хемофилтрацијата, метод за кој пациентите не биле јасно информирани за сите негови позитивни и негативни ефекти, со што тие биле доведени во заблуда, а со цел противправно прибавување на имотна корист.
Процесот го води судијката Лидија Петровска, а застпаник на обвинението е обвинителката Искра Хаџи Василева. ар/лв/