Германија ќе го финансира купувањето на 180.000 артилериски гранати за Украина
- Германското Министерство за одбрана соопшти дека земјата ќе и помогне на Чешка да ја зголеми доставата на муниција за Украина преку финансирање на набавка на 180.000 артилериски гранати, во вредност од 576 милиони евра.
![Германија ќе го финансира купувањето на 180.000 артилериски гранати за Украина](https://mia.mk/index.php/images/20240402121121_big_730x400_16.webp )
Берлин, 2 април 2024 (МИА) - Германското Министерство за одбрана соопшти дека земјата ќе и помогне на Чешка да ја зголеми доставата на муниција за Украина преку финансирање на набавка на 180.000 артилериски гранати, во вредност од 576 милиони евра.
Минатиот месец министерот за одбрана Борис Писториус најави пакет помош за Украина во вредност од 478 милиони евра. Според Министерството за одбрана, со оваа најава, вкупниот износ на помошта за Украина ќе надмине една милијарда евра.
Чешка покрена иницијатива за снабдување со гранати за да се задоволи итната потреба на Украина од муниција во борбата против руската инвазија која започна пред повеќе од две години.
Чешкиот премиер Петр Фиала на 8 март рече дека преку чешката иницијатива се собрани доволно средства од сојузниците за купување на првата серија од 300.000 артилериски гранати и дека вкупно 800.000 од тие гранати се достапни во трети земји.
Чешкиот претседател Петр Павел тогаш прецизираше дека на располагање се 500.000 парчиња муниција од 155 милиметри и 300.000 од 122 милиметри.
Муницијата може да се испрати откако за неа ќе се обезбедат средства. ссм/
фото: ЕПА архива