Скопје, 31 март 2025

Либералниот институт Скопје денеска во градскиот парк во Скопје успешно реализираше герила акција и креативна комуникациска кампања со цел подигнување на свеста за корупцијата и нејзините штетни последици врз општеството. Со оваа иновативна акција, која вклучи неформални и креативни методи, целиме да ги поттикнеме граѓаните на активен отпор и да ги едуцираме за опасностите што корупцијата ги носи во секојдневниот живот.

Според истражувањата, една четвртина од јавните средства се трошат на коруптивен начин – тоа значи дека граѓаните добиваат 1/4 помалку од доброто кое треба да го добијат, но и од услугите за кои плаќаат во здравството, социјалната заштита и образованието. Овој системски проблем директно влијае врз квалитетот на животот и ја подрива довербата во институциите.

Корупцијата е една од најголемите пречки за развојот на Македонија и за процесот на европска интеграција. Европската Унија редовно ја нагласува потребата од ефективна борба против корупцијата, а Либералниот институт Скопје останува посветен на антикорупциското движење, потсетувајќи дека нејзините разорни ефекти ги гледаме секојдневно низ разни трагедии и неквалитетни јавни услуги.

Денешната герила акција на тема антикорупција имаше за цел на иновативен начин да ја претстави штетата што ја предизвикува корупцијата. Преку делење на производи – храна на која недостасуваше 1/4, симболично го прикажавме делот што недостига од нашите даноци и јавни средства, а кои незаслужено се одлеваат во приватни џебови. Оваа акција ги поттикна граѓаните да размислат за сопствениот придонес во борбата против корупцијата и за потребата од системски промени.

Либералниот институт Скопје останува посветен на унапредување на транспарентноста, отчетноста и владеењето на правото. Нашите активности продолжуваат и во иднина, а преку креативност и иновативни методи ќе продолжиме да поттикнуваме дискусија и да бидеме пример за акција за антикоруптивни практики и однесување.

Либерален институт Скопје

_____________________________________________________________________________________ 

МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки

Фото: Либерален институт Скопје