Скопје, 13 јануари 2025 (МИА) - Општина Центар информира дека синоќа на терен биле ангажирани четири големи возила и две мали за чистење снег, интензивно се посипувало со сол и се расчистувале улиците во населбите Мало Курило, Водно, Дебар Маало, Маџир Маало, Кале, Капиштец и Крњево.

- Утринава се чистат тротоарите и приодите до јавните установи, како што се амбуланти, здравствени и пензионерски домови, детски градинки, со цел да се обезбеди безбедно движење за сите граѓани, стои во соопштението.

Градоначалникот на Општина Центар Горан Герасимовски апелира до жителите и до сопствениците на малите бизниси и ресторани да одржуваат чистотата пред своите објекти.

- Особено е важно приодите да бидат ослободени од снег и мраз за да се овозможи безбедно движење за сите. Нашите тимови постојано ја следат состојбата и вложуваат максимални напори за одржување на улиците проодни. Заедно можеме да создадеме побезбедни улици за сите, истакна Герасимовски.

Досега, како што се наведува, се расчистени главните сообраќајници, собирните улици и сервисните патишта во станбените зони за да се овозможи непречено реализирање на секојдневните обврски на граѓаните. мд/са/

Фото: Општина Центар