Скопје, 25 ноември 2024 (МИА) - Претседателот на Собранието на Република Северна Македонија,  Африм Гаши во рамки на официјалната посета на Република Косово денеска остварил средба со претседателот на Собранието на Република Косово, Глаук Коњуфца.

На средбата присуствувале и пратениците Имрлије Салиу-Фетаи, претседател на пратеничка група на Собранието на Република Северна Македонија за соработка со Парламентот на Република Косово и  Тони Јаревски, член на пратеничка група на Собранието на Република Северна Македонија за соработка со Парламентот на Република Косово.

Како што соопшти собраниската прес-служба, претседателот Гаши се заблагодарил за срдечниот прием и подвлекол дека оваа посета е потврда за потврда на одличните и конструктивни билатерални односи меѓу Република Северна Македонија и Република Косово, како и плодната соработка меѓу двете држави на сите нивоа.

- Гаши оцени дека билатералната парламентарна соработка е со интензивна динамика со тенденција трендот да продолжи и во иднина. Фреквенцијата на возвратните билатералните средби, за која претседателот Гаши се залагал и во текот на неговиот мандат како претседател на Пратеничка група на Собранието на Република Северна Македонија за соработка со Парламентот на Република Косово, резултираше со значително унапредување на дијалогот меѓу двете држави и одржување на Втората заедничка седница на владите на 18 ноември годинава. Двата парламенти успешно соработуваат и се поддржуваат и на мултилатерален план, во рамките на меѓународните парламентарни собранија на Процесот за соработка во Југоисточна Европа (ПСЈИЕ), Советот на Европа и Франкофонијата и споделуваат заедничка визија за стабилен Западен Балкан, интегриран во евроатлантските структури. Иднината на Западен Балкан е во Европската Унија и НАТО, стои во соопштението од Собанието на Република Северна Македонија.

Претседателот на Собранието на Република Косово, Коњуфца искажал благодарност за постојаната поддршка од Република Северна Македонија на сите нивоа од независноста до денес. Подвлекол дека постојаната реципрочна поддршка на сите нивоа е рефлексија на одличните, пријателски и неоптеретени односи меѓу двете држави.

- Република Северна Македонија и Република Косово споделуваат исти предизвици: приближување на стандардите на ЕУ, имплементација на реформи, соочување со предизвици и правење компромиси со соседите, рекол Коњуфца, се вели во соопштението.

Соговорниците се согласиле дека нашиот регион треба да е дел од Европската унија што поскоро имајќи го во вид геополитичкиот контекст на континентот и значењето на регионот за мирот и стабилноста во Европа и пошироко. цр/са/

Фото: Собрание на РСМ