Рим, 15 мај 2025 (МИА) - Дефанзивецот на Милан, Матео Габија, призна дека неговиот тим не направил доволно за да го освои финалето на Купот на Италија против Болоња, и покрај контроверзните судиски одлуки кои, верува тој, требало да резултираат со црвен картон.

Милан загуби со 0-1 на стадионот Олимпико во Рим, откако Дан Ндоје го постигна единствениот гол во 53-тата минута.

-Разочарани сме од начинот на кој се одвиваше натпреварот, тешко е да се пронајдат вистинските зборови. Постои горчина и жалење бидејќи оваа сезона беше негативна за нас во целина. Ова можеше да биде одлична вечер, но не ја искористивме максимално, изјави Габија за „Спорт Медиасет“.

Дефанзивецот нагласи дека Милан бил подготвен за агресивниот стил на Болоња.

-Знаевме дека Болоња игра со личен пресинг, што создаде проблеми не само за нас, туку и за многу тимови. Можевме и требаше да играме подобро. Во такви ситуации, мора да имате сила и да кажете: „Браво за противникот“, истакна тој.

Со својот триумф на турнирот, Болоња обезбеди учество во Лигата на Европа, додека Милан ризикува да биде изоставен од сите европски турнири бидејќи го зазема осмото место во Серија „А“.

-Во моментов, нашата енергија е речиси исцрпена - дадовме сè на теренот, но тоа не беше доволно. Ни остануваат уште два натпревари во кои треба да ја завршиме сезоната со достоинство и гордост, порача Габија.

Фудбалерот не ги игнорираше одлуките на судијата, што предизвикаа бурни реакции од страна на „росонерите“. Тие бараа црвен картон за Луис Фергусон за груб старт врз Рафаел Леао, како и исклучување на Сем Бокема за удирање со лакт на Габија во ребрата во статична ситуација.

-Не сакам да коментирам - сега е ирелевантно. Мислам дека беше доволно јасно, но тоа повеќе ништо не менува. Мораме да се концентрираме на работите што не ги направивме добро. Затоа вечерва е разочарување и се враќаме во Милано со празни раце, рече Габија кога му беше прикажана снимката од ситуацијата. дс

Фото: Принтскрин