Во црквата во Пустец наскоро заедничка богослужба на митрополитите г. Петар и г. Јован
- Набрзо заедничка богослужба во црквата „Свети Архангел и Михаил“ во Пустец ќе одржат Митрополит Преспанско-пелагониски и администратор Австралиски и Новозеландски г. Петар и корчанскиот митрополит Јован.
![Во црквата во Пустец наскоро заедничка богослужба на митрополитите г. Петар и г. Јован](https://mia.mk/index.php/images/20240507145204_big_730x400_13.webp )
Дебар, 7 мај 2024 (МИА) - Наскоро заедничка богослужба во црквата „Свети Архангел и Михаил“ во Пустец ќе одржат Митрополит Преспанско-пелагониски и администратор Австралиски и Новозеландски г. Петар и корчанскиот митрополит Јован.
Ова е договорено на велигденската средба во седиштето на Митрополијата на Корча, на лидерот на Македонска алијанса за европска интеграција, МАЕИ Васил Стерјовски и митрополитот Јован.
- Во Корчанската митрополија бев на традиционалната посета по повод големиот христијански празник Воскресение Христово – Велигден. На митрополит Јован му го честитав празникот и му посакав добро здравје, радост, мир и спокојство. На средбата меѓу другото се договоривме за заедничка богослужба во црквата во Пустец на митрополитите Петар и Јован, информираше Стерјовски за МИА.
Од негово и од име на партијата и Македонците, тој упатил честитка и до сите верници кои го слават празникот, посакувајќи им многу здравје, среќа, благосостојба.
- Исто така, со корчанскиот митрополит Јован разговаравме и за состојбата со македонските верници и со верските објекти во Мала Преспа и единствениот манастир во ова подрачје „Света Марина“ во Туминец, каде со благослов на митрополитот Јован и донации на Македонците од Канада е изградена камбанарија, што на манастирот му недостигаше, рече тој.
На средбата Стерјовски бил придружуван од Атанас Плоча, заменик градоначалник на општина Пустец. вт/лв/
Фото: МАЕИ