Кавадарци, 24 април 2025 (МИА) - „3ајакнување на младите преку нови можности 2“ е насловен проектот што се спроведува во Кавадарци, што има за цел да зајакне млади од ранливите категории и да им го олесни пристапот до пазарот на трудот, информираа попладнево од кабинетот на градоначалникот Митко Јанчев. 

- На наше задоволство, втор пат во Кавадарци имаме настан кој е дел од проектот „3ајакнување на младите преку нови можности 2“ кој ја зајакнува вработливоста на младите во 6 региони во државата, а Општина Кавадарци е партнер во реализацијата на проектот. СОС Детско село на Република Македонија во соработка со општина Кавадарци, со финансиска поддршка од Министерството за економска соработка и развој на Сојузна Република Германија и Фондацијата Херман Гмајнер го имплементираат овој проект што има за цел да зајакне млади од ранливите категории и да им го олесни пристапот до пазарот на трудот, соопштија од кабинетот на Јанчев. 

Притоа појаснија дека во рамки на проектот, на младите лица достапни им се бесплатни обуки за животни вештини и вработливост, кариерно советување од лиценцирани кариерни советници, психо-социјална поддршка, финансиска поддршка за посетување на курсеви, посредување за идентификување на можности за практиканство и вработување. 

- Една од целите на проектот е да придонесе кон подобрени локални политики за социо-економска интеграција на младите во социјален ризик. Општина Кавадарци заедно со СОС Детско село работи и ќе продолжи да работи и во иднина на креирање на активности за стратешка соработка со НВО-и од Кавадарци, СОС Детско село и бизнис заедницата, во насока на унапредување на вработливоста на младите од општина Кавадарци и Вардарскиот плански регион, подвлекоа од кабинетот на Јанчев. свд/мд/

Фото: Фејсбук на градоначалникот Митко Јанчев