Скопје, 12  април 2022 (МИА) - Поради владините одлуки со кои се намали акцизата и ДДВ за нафтени деривати, се амортизираа ценовните разлики и од денес цените на горивата се намалени. Дизелот поевтинува за два, а бензините за денар по литар, порачуваат од Владата. -Соодветно на намалената акциза и ДДВ за нафтените деривати, се намали и цената на другите горива. Во услови на светска енергетска криза, имаме најевтини цени на горивата во регионот, информираат од владината прес-служба. Ова, како што посочуваат, се само дел од резултатите од антикризните мерки за намалување на ДДВ и акцизата за горивата за заштита на животниот стандард на граѓаните и задржување на ликвидноста на компаниите. -Со владините мерки го ублаживме големото поскапување на храната и енергенсите и граѓаните месечно заштедуваат по 300 денари за нафта, по 1.500 денари за храна и по 2.150 денари за сметката за струја. Покрај сите овие мерки, Владата ја покачи и минималната плата на 18.000 денари и оствари рекордно покачување на пензиите, вклучувајќи и дополнителна финансиска поддршка за пензионерите, велат од Владата. Нагласуваат дека се издвоени речиси 615 милиони евра до сега, за справување со предизвиците од најголемата глобална криза по Втората светска војна.вј/са/