Манчестер, 3 декември 2024 (МИА) - Како прв тренер на Манчестер Јунајтед, Руд ван Нистелрој оствари три победи и едно реми, но тоа не беше доволно за да остане на клупата на клубот од „Олд Трафорд“, па дури и да биде дел од стручниот штаб на новиот тренер. Рубен Аморим, а Холанѓанецот подоцна го презеде тимот на Лестер.

Гледано од страна, сето тоа е сосема доволно за поранешниот напаѓач на „црвените ѓаволи“ да се налути, не само на клупските челници, туку и на Португалецот кој според многумина премногу лесно се откажа од него. Но тоа не е така. Уште повеќе, Ван Нистелрој му е благодарен на Аморим што поразговарал со него.

-Сите знаат дека сум врзан за Манчестер Јунајтед и тоа е единствениот клуб каде што би прифатил да бидам помошник тренер. Бев подготвен да бидам со Аморим, но тој имаше други планови. Рубен ми се јави и двајцата разговаравме како двајца мажи и како двајца менаџери. Тој се однесуваше како вистински господин и за тоа сум му благодарен. Ми ја претстави својата визија, рече дека нема место за мене, но без остри зборови. Тој го направи она што мисли дека е најдобро за него и за клубот што го презеде, и јас имам најголема почит за тоа. И да бидам целосно искрен, тој разговор ми даде сила да продолжам и да се впуштам во нова авантура на клупата на Лестер, изјави Холанѓанецот. дс

Фото: Архива