Британско Министерство за одбрана: Окупациските власти во Украина подготвуваат референдуми за приклучување кон Русија
- Британското Министерство за одбрана денеска објави проценка дека властите инсталирани од Русија на окупираните територии на југот на Украина веројатно се подготвуваат годинава да одржат рефер
![Британско Министерство за одбрана: Окупациските власти во Украина подготвуваат референдуми за приклучување кон Русија](https://mia.mk/index.php/images/20221113191031_big_730x400_13.webp )
Лондон, 30 јули 2022 (МИА) - Британското Министерство за одбрана денеска објави проценка дека властите инсталирани од Русија на окупираните територии на југот на Украина веројатно се подготвуваат годинава да одржат референдуми за приклучување кон Русија, јавува Радио Слободна Европа.
Во својот дневен билтен на Твитер, Министерството соопшти дека „окупациските власти во Украина“ се под зголемен притисок од Москва да ја зацврстат контролата.
„Локалните власти веројатно го принудуваат населението да дава лични податоци за да ги состави избирачките списоци“, наведува Министерството.
Се додава дека Русија во моментов смета дека окупираните територии во Украина се под привремена „цивилно-воена администрација“.
Минатиот месец, воената администрација инсталирана од Москва во областа околу окупираниот град Херсон соопшти дека се подготвува да одржи референдум за приклучување кон Русија.
Херсон, пристаниште на Црното Море, е целосно под руска контрола од почетокот на март. паг/