Битиќи: ММФ ќе продолжи со силна поддршка на државава на патот кон полноправно членство во ЕУ
- Вицепремиерот за економски прашања, координација на економските ресори и инвестиции, Фатмир Битиќи, во седиштето на Меѓународниот монетарен фонд (ММФ) во Вашингтон, САД, имаше две одделни работни средби со Пол Хилбертс, извршен директор во Бордот на директори на ММФ, и со Жак Алаин, шеф на мисијата на ММФ за Северна Македонија.
![Битиќи: ММФ ќе продолжи со силна поддршка на државава на патот кон полноправно членство во ЕУ](https://mia.mk/index.php/images/20230925215344_big_730x400_23.webp )
Скопје, 25 септември 2023 (МИА) - Вицепремиерот за економски прашања, координација на економските ресори и инвестиции, Фатмир Битиќи, во седиштето на Меѓународниот монетарен фонд (ММФ) во Вашингтон, САД, имаше две одделни работни средби со Пол Хилбертс, извршен директор во Бордот на директори на ММФ, и со Жак Алаин, шеф на мисијата на ММФ за Северна Македонија.
-На средбите во ММФ беше реафирмирана оценката дека економската стабилност и раст на Северна Македонија, во голем степен се зависни од фискалната политика, со која преку ефективни владини трошења и јасно поставени буџетски приоритети, значајно може да се помогне во поставувањето на избалансирана и одржлива економска рамка, соопшти вечерва владината прес-служба.
Во седиштето на ММФ се зборуваше и за важноста од функционирање на механизам за системска анализа на јавните расходи, како алатка за континуирана и структурана евалуација на јавната потрошувачка, идентификување на изворите на неефикасност и проценка на усогласеноста на јавните расходи со економските приоритети и цели. Со целосното имплементирање на овој механизам Владата ќе може да носи информирани одлуки за распределба на јавните ресурси, обезбедувајќи ефикасно и ефективно користење на средствата на даночните обврзници.
Од страна на претставниците на ММФ беше нагласено значењето на усогласување на економските политики со Целите за одржлив развој, дефинирани во Агенда 2030, за што вицепремиерот Битиќи истакна дека Владата силно работи на промовирање и спроведување на политики кои ја поттикнуваат транзицијата кон зелена економија, како што се интензивираните инвестиции во обновливи извори на енергија и зајакнувањето на отпорноста на инфраструткурата кон климатските промени. Притоа заеднички беше оценето дека меѓусебната поврзаност на економските и еколошките фактори и ја нагласува потребата од одговорни и напредни политики за справување со предизвиците на 21 век.
Заедничка констатација во средбите со високите претставници на ММФ е дека оваа финансиска институција досега се има покажано како значаен партнер кој има обезбедено значајна финансиска, техничка и советодавна помош на Северна Македонија за да и помогне да ги зајакне своите политики и да ги усогласи правните и регулаторни рамки со стандардите на ЕУ.
-ММФ ќе продолжи со силна поддршка на земјата на патот кон полноправно членство во ЕУ преку промовирање и поддршка во делот на економската стабилност, фискалната дисциплина и структурните промени, политики кои се во целост усогласени со тие на земјите-членки на ЕУ, информираше владината прес-служба.вј/лв/
Фото: Влада