Басманскиот суд во Москва издаде налог за апсење на Јулија Навална и ја стави на меѓународна потерница
- „Јулија Борисовна не им беше достапна на истражните органи во претходната истрага. Во врска со тоа таа е ставена на потерница“, се наведува во соопштението на судот, пренесено од руските медиуми.
![Басманскиот суд во Москва издаде налог за апсење на Јулија Навална и ја стави на меѓународна потерница](https://mia.mk/index.php/images/20240709174320_big_730x400_48.webp )
Москва, 9 јули 2024 (МИА) – Басманскиот Окружен суд во Москва денеска издаде налог за апсење во отсуство на Јулија Навални, вдовицата на рускиот опозициски лидер Алексеј Навални, поради нејзината наводна вмешаност во екстремистичка заедница.
„Јулија Борисовна не им беше достапна на истражните органи во претходната истрага. Во врска со тоа таа е ставена на потерница“, се наведува во соопштението на судот, пренесено од руските медиуми.
Судот појаснува дека одлучил да донесе превентивна мерка против Јулија Навална откако ја разгледал претставката на истражните органи.
„Таа е обвинета за сторено кривично дело според делот 2 од член 282.1 од Кривичниот законик на Руската Федерација - учество во екстремистичка организација“, се додава во соопштението.
Притворот се смета од моментот на екстрадиција на територијата на Русија или од моментот на задржување на територијата на Руската Федерација.
Федералното надзорно тело за финансии Росфинмониторинг денеска донесе одлука Навална да ја вклучи во регистарот на организации и поединци вклучени во екстремистички активности или тероризам.сд/
фото:МИА архива