Вашингтон, 3 февруари 2025 (МИА) - Министерот за одбрана на САД Пит Хегсет денеска ќе ја посети границата со Мексико во својата прва официјална посета од преземањето на функцијата. Ова е уште еден сигнал дека зајакнувањето на границата останува приоритет и за Пентагон и за администрацијата на Доналд Трамп, оценуваат американските медиуми.

Трамп сè почесто ја ангажира војската за спроведување на неговата имиграциска политика, вклучувајќи испраќање трупи на границата, користење воени авиони за депортација и отворање воени бази за сместување на мигрантите.

„Претседателот бара 100% оперативна контрола на границата – и ние ќе ја обезбедиме“, напиша Хегсет на Икс, најавувајќи ја посетата.

Во саботата, Трамп прогласи вонредна состојба, наведувајќи ја како причина „сериозната закана“ од нелегалната имиграција и фентанилот. Во тој контекст, тој воведе нови царини за увозот од Мексико и Канада, како и дополнителни царини за кинеските стоки.

Минатата недела, Трамп најави проширување на центарот за задржување во воената база Гвантанамо на Куба, кој ќе може да прими 30.000 лица.

Во меѓувреме, Пентагон веќе започна со депортација на над 5.000 мигранти, кои се задржани од американските власти во Ел Пасо (Тексас) и Сан Диего (Калифорнија). ссм/

фото: ЕПА