Shkup, 1 korrik 2024 (MIA) - Sipas Kushtetutës, të gjithë kanë të drejtë të përdorin mjete demokratike për të shprehur pakënaqësinë e tyre. Por nëse kjo pakënaqësi është në dëm të karakterit unitar apo në dëm të ligjeve dhe Kushtetutës, atëherë ne si Qeveri do të duhet ta mbrojmë atë, tha kryeministri Hristijan Mickoski në lidhje me deklaratën e djeshme të liderit të BDI-së Ali. Ahmeti se "kjo qeveri nuk do të ketë legjitimitet etnik" dhe se do të demonstrojnë pakënaqësinë e tyre me atë "vendim të padrejtë dhe mospërfillje të legjitimitetit".

Duke iu përgjigjur pyetjeve të gazetarëve, Mickoski tha se "Maqedonia është vend demokratik" në të cilin e drejta e çdo qytetari nuk është e garantuar me përkatësi etnike, por si të drejtë të qytetarit. Siç tha ai, është i habitur nga BDI-ja dhe kryesia e asaj partie që nuk e kanë marrë mësimin “se duhet të shfrytëzohet kjo periudhë në opozitë me reforma të kuadrit dhe programeve" për të ofruar zgjidhje të reja në zgjedhjet e ardhshme.

"Jam i habitur se si kryesia e BDI-së i ndan shqiptarët si askush më parë në Maqedoni, në shqiptarë të përshtatshëm dhe shqiptarë të papërshtatshëm. Këtë e bën kryesia e BDI-së, e cila apelon për legjitimitetin e shqiptarëve. Më vjen keq që vazhdojnë të zhyten në moçalin e tyre politik dhe mesazhi im për ta është i njëjtë si për LSDM-në, ju japim dorën - sa herë që është në pyetje interesi i shtetit dhe interesi i qytetarëve si dhe të qëndrojnë krah për krahë me politikat qeveritare dhe të ndërtojmë politikë, të ndërtojmë një konsensus", theksoi Mickoski pas vendosjes së gurthemelit për një kopsht të ri në komunën e Butelit.

Ai shtoi se nuk dëshiron që "kjo të jetë rrugë njëkahëshe", por dykahëshe, sepse, tha ai, "qytetarët janë ngopur me lojëra politike, intriga dhe përçarje".

"Qytetarët duan unitet, duan projekte të tilla, duan që ne të realizojmë diçka që do të thotë vlerë e shtuar në jetën e tyre. Ne si Qeveri jemi përkushtuar që ta bëjmë këtë dhe siç e shihni e bëjmë për të tetën ditë", tha kryeministri.

Në pyetjen se a "po ngushtohet rrethi i BDI-së" me vendimet e para të Qeverisë, siç është anulimi i vendimit për Fakultetin e Shkencave Shëndetësore në Universitetin e Ramiz Merkos në Strugë dhe heqja e drejtorëve ekonomikë në Qendrën Klinike, Mickoski është përgjigjur për fakultetin e planifikuar që punon për anulimin e vendimit të mëparshëm sepse, tha ai, "është në kundërshtim me ligjet dhe nuk i plotëson kriteret dhe kushtet".

"Nëse thelloheni në atë procedurë, do të shihni se praktikisht komisioni që ka dhënë më parë pëlqimin, i njëjti komision e anulon pëlqimin e dhënë më parë. Pra, Ministrisë nuk i mbetej gjë tjetër veçse të vepronte sipas atyre udhëzimeve, dhe për këtë arsye pëlqimi i mëparshëm për organizimin e një lloji të tillë studimesh në universitet praktikisht është anuluar dhe tani ata nuk kanë më të drejtë të organizojnë një lloj të tillë arsimi të lartë atje", tha Mickoski. sa/

Foto: printskrin