MIA FLESH
- Shkup - Sot shënohet 1 prilli - Dita e gënjeshtrave. Kjo nuk është festë kombëtare, por gjithkund në botë shënohet si ditë kur shumë veta bëjnë shaka apo gënjejnë.

09:00/ 1 prill / 2025
Shkup - Sot shënohet 1 prilli - Dita e gënjeshtrave. Kjo nuk është festë kombëtare, por gjithkund në botë shënohet si ditë kur shumë veta bëjnë shaka apo gënjejnë.
Shkup - Ministri i Shëndetësisë dhe një nga liderët në koalicionin VLEN, Arben Taravaari mbrëmë në intervistë për "360 gradë" në RTMV ka shprehur kritika publike për funksionimin e partive shqiptare në Qeveri. Sipas tij, koalicioni VLEN po funksionon “plogët” dhe duhet gjetur një model për sinkronizim më të mirë. Një mendim i tillë, siç thotë ai, nuk ka qenë vetëm i tij personal, por ai e ka bazuar edhe në anketat e kryera kryesisht te shqiptarët në vend.
Shkup - Kuvendi i Maqedonisë sot duhet të fillojë seancën e 42-të, ndërsa paraprakisht deputetët në kuadër të seancës së 38-të duhet të votojnë për pikën e vetme që ka mbetur e pashqyrtuar - Propozim ligji për ndryshimin dhe plotësimin e Ligjit për sigurim pensionaë dhe invalidor, me procedurë të shkurtuar. Për deputetët këto do të jenë seancat e para parlamentare pas pauzës dyjavore pas tragjedisë në Koçab më 16 mars, ku e humbën jetën 59 persona, ndërsa mbi 190 janë të lënduar.
Shkup – Ndalesa për përdorimin e mjeteve piroteknike në hapësirë të mbyllur dhe rritje e gjobave për persona fizikë dhe juridikë propozohet në ndryshimet dhe plotësimet e Ligjit për kundërvajtjet kundër rendit dhe qetësisë publike i cili është në rend dite në mbledhjen e sotme të 42-të të Kuvendit.
Shkup - Në Këshillin gjyqësor sot deklaratë solemne do të japin gjyqtarët e sapozgjedhur nga radhët e kandidatëve nga Akademia për gjyqtarë dhe prokurorë publikë.
Shkup - Në Kuvendin e Maqedonisë së Veriut sot seanca do të mbajnë komisionet për çështje të zgjedhjeve dhe emërimeve, për transport, transformim digjital, mjedis jetësor dhe planifikim hapësinor dhe Komisioni Ligjvënës-juridik.
Shkup - Moti sot do të jetë me vranësira të ndryshueshme, me reshje të kohëpaskohshme të shiut dhe me erë të dobët deri mesatare veriore. Pasdite dhe në orët e mbrëmjes do të jetë i jostabil me reshje të rrëmbyeshme dhe bubullimë, lokalisht në formë të stuhisë afatshkurtër me reshje më të mëdha të shiut. Për një kohë të shkurtë pritet të bijnë mbi 15 litra shi në një metër katror. Temperatura minimale do të jetë në interval prej katër deri 10, ndërsa maksimalja do të jetë prej 11 deri 18 gradë.
Shkup – Komunikacioni në rrugët shtetërore zhvillohet pa ndërprerje, nëpër rrugë të lagështa. Intensiteti i komunikacionit në akset rrugore jashtë mjediseve urbane është mesatar. Në vendkalimet kufitare nga ana e Maqedonisë së Veriut nuk ka pritje më të gjata për hyrje dhe dalje nga shteti.
Paris – Liderja franceze e ekstremit të djathtë Marin Le Pen deklaroi se vendimi gjyqësor me të cilin i ndalohet të kryejë funksione në praktikë e përjashton nga gara për zgjedhjet presidenciale në vitin 2027. Ajo theksoi se nuk ka shpresa të mëdha se ankesa e saj do të shqyrtohet para zgjedhjeve.
Londër- Përfaqësues të lartë ushtarakë britanikë, francezë dhe ukrainas do të mbajnë takim në ditët në vijim për t'i dhënë "impuls real" përpjekjeve për të përforcuar sigurinë e Ukrainës, deklaroi zëdhënësi i kryeministrit britanik, Kir Starmer.
Uashington - Në stuhinë në juglindjen të Miçigenit nga një dru i rrëzuar e kanë humbur jetën tre persona, ndërsa moti i lig la pa rrymë 400.000 amvisëri në pesë shtete amerikane, njoftuar mbrëmë një pjesë e mediave amerikane.
Uashington - Presidenti amerikan, Donald Tramp sot nënshkroi dekret për të lehtësuar tërheqjen e investimeve të korporatave në SHBA me vlerë më shumë se një miliard dollarë, kumtoi Shtëpia e Bardhë.