Kajro, 2 dhjetor 2024 (MIA) - Përfaqësuesit e Kombeve të Bashkuara (KB) sot e përshkruan gjendjen në Gazë si "të tmerrshme dhe apokaliptike", duke pretenduar se kushtet me të cilat po ballafaqohen palestinezët në enklavë mund të konsiderohen si “krimet më të rënda ndërkombëtare”.

Sekretari i përgjithshëm i KB-së, Antonio Guteresh, përmes zëvendëses së tij Amina Mohamed në konferencën në Kajro për përshpejtimin e dërgimit të ndihmave humanitare në Rripin e Gazës i bëri thirrje komunitetit ndërkombëtar që të vendosë themelet për paqen e qëndrueshme në Gazë dhe gjithë Lindjen e Mesme.

Sipas të dhënave të Ministrisë së Shëndetësisë në Gazë në pothuajse 14 muaj luftime mes Izraelit dhe grupit palestinez Hamas, janë vrarë mbi 44.000 persona. 

"Kequshqyerja është endemike... Uria është e pashmangshme. Në ndërkohë, sistemi shëndetësor është në kolaps", deklaroi Guteresh. Ai shtoi se Gaza tani e ka "numrin më të madh të fëmijëve me amputime për kokë banori në botë, pas operacioneve që ndonjëherë kryhen pa anestezion". qa/

Foto: arkivi