Скопје, 23 април 2026 (МИА) - Пржинската влада мора да остане, во спротивно пратеничката група на СДСМ ќе се повлече од работната група за Изборниот законик,- изјави денеска лидерот на СДСМ, Венко Филипче.

Филипче на прес-конференција во Собранието нагласи дека со целосно автократскиот манир на владеење на аклтуелната власт, пржинската влада е единствен контролен механизам што гарантира фер и слободни избори.

- Овој целосно автократски манир на владеење на оваа власт што го гледаме е еднаков на владеењето на Никола Груевски. Ако денеска помине на Комисија овој Закон за Владата како што е, нашата пратеничка група се повлекува од работната група за Изборниот законик - изјави Филипче.

Тој посочи дека како партија мора да укажат и граѓаните да знаат со каква власт имаат работа и зошто, како што нагласи, се бега од контрола и механизам што гарантираат фер и слободни избори.

- Ова е автократска власт. Апсолутно корумпирана. Зошто не сакаат да остане пржинската влада. Од што се плашат и бегаат - нагласи Филипче.

Прашан во однос на најавеното повлекување од Работната група за Изборниот законик, кој е дел од реформската агенда, Филипче рече дека ниту еден друг закон од реформската агенда не е донесени и нагласи дека главен блокатор на европските преговори на земјава и реформската агенда е Христијан Мицкоски. 

-Ние дававме предлози за реформските закони, никој не одговори од Министерството за правда и ниту еден закон не се донесе. Каква реформска агенда, тие тоа не ги интересира. Сега кога ќе снема пари во буџетот ќе се распишат избори – изјави Филипче. 

Филипче исто така изрази уверување дека ќе има предвремени избори посочувајќи дека затоа им се брза со овие законски измени.

- Им се брза зашто снемува пари во буџетот за нивните бизнис-интереси. Се брза да се донесе законот за да се распишат предвремени избори. Законот за избори не може да се донесе без нашата пратеничка група - нагласи Филипче.

Прашан дали би учествувале на предвремени избори, Филипче рече, апсолутно да, „затоа што го слушаме гласот на наордот“.  аа/са/

Фото: МИА

Видео: СДСМ