Виена, 5 март 2026 (МИА) - Одборот на Меѓународната агенција за атомска енергија (МААЕ) усвои резолуција во која се изразува загриженост за повторените и ескалирачки напади врз енергетската инфраструктура на Украина.

Овие напади претставуваат „закана за нуклеарната безбедност“, се вели во текстот.

За прв пат од почетокот на војната во Украина, управното тело на МААЕ усвои резолуција без поддршка од САД.

„Продолжуваме да ја поддржуваме работата на МААЕ во Украина, но не го поддржуваме разгледувањето на непотребна нацрт-резолуција што не придонесува за постигнување мир меѓу Украина и Русија“, изјави Хауард Соломон, вршител на должноста на амбасадорот на САД во организацијата.

Резолуцијата ја поднесоа Канада и Холандија и беше усвоена со 20 гласа „за“, четири „против“ и 10 „воздржани“, според дипломатски извор.

Покрај САД, Кина, Русија и Нигер гласаа против текстот на резолуцијата.

Во документот се наведува дека во своите извештаи, генералниот директор на МААЕ, Рафаел Гроси, предупредил на „зголемени ризици“ за нуклеарните централи во Украина.

Според резолуцијата, нападите врз енергетската инфраструктура на Украина, која е клучна за надворешното снабдување со електрична енергија на нуклеарните централи, претставуваат директна закана за нуклеарната безбедност и сигурност.

МААЕ бара од Гроси да предложи „дополнителни мерки за спречување на нуклеарна несреќа“ доколку се појават нови ризици. мс/

фото: ЕПА