Крива Паланка, 13 декември 2023 (МИА) - Општина Крива Паланка ја најави организираната богата и разновидна културно-забавна програма во екот на предновогодишните празници со „Новогодишен базар 2023“, традиционални специјалитети, топли напивки и ракотворби. Во тек е јавен повик за закуп на штандови на централниот градски плоштад каде ќе се одржат сите настани.

Базарот почнува на 22 декември и ќе трае сѐ до 30 декември вечерта.

-Најавуваме нови незаборавни моменти и загарантирана забава за сите генерации. Започнуваме на 22 декември, петок, во 19 часот со викенд програма, за која Дејви и Наталија се задолжени за првите три дена. Целата програмата ќе понуди бројни настапи на наши, македонски, изведувачи и бендови, а најмладите и тинејџерите ќе уживаат во креираната за нив забавна шема: детски претстави, концерти, жонглери, комични настапи и секогаш спектакуларното пристигнување на Дедо Мраз на 30 декември, сабота, информира службата за комуникација со јавност во Општина Крива Паланка.

Оттаму најавуваат дека програмата ќе трае и вечерта на 30 декември, поканувајќи ги сите љубители на добра музика од различни возрасти.

-Ќе настапат: ДНК, Слаткар, Дац и Александар, Мартина Станојковиќ, „Дајте музика“,  „Распеани симитчиња“ и многу други. Топло и срдечно ќе ве дочекаат нашите вредни паланчани, со: греано вино, германски колбас, вафли, топол чај, чварки и пивтии, детски реквизити и многу други содржини, велат од Општината.

„Новогодишен базар“ се одржува трета година по ред во Крива Паланка и од година во година е сѐ помасовно посетен од страна на граѓани од целата држава, но и од соседството. ид/мд/

Фото: Општина Крива Паланка