Shkup, 12 prill 2026 (MIA) – Presidentja Gordana Siljanovska-Davkova, me rastin e festës së madhe të krishterë, Ringjallja e Krishtit – Pashkët, i dërgoi urim kreut të Kishës Ortodokse Maqedonase – Kryepeshkopatës së Ohrit, Kryepeshkopit të Ohrit dhe Maqedonisë dhe Justiniana I z. z. Stefan, anëtarëve të Sinodit të Shenjtë të Ipeshkvijve të Kishës Ortodokse Maqedonase - Kryepeshkopata e Ohrit, si dhe klerit, murgjve dhe gjithë besimtarëve të besimit ortodoks.

“Në këto ditë të larta dhe të bekuara, kur zbulohet misteri i jetës si fitore mbi vdekjen dhe drita triumfon mbi errësirën, ju uroj nga zemra që në shtëpitë tuaja të mbretërojnë paqja, dashuria, shëndeti dhe fryma hyjnore. Ringjallja e Krishtit është themeli i besimit të krishterë, burim i përjetshëm shprese dhe thelbi i ekzistencës njerëzore. Në të përfshihet e vërteta më e thellë e shndërrimit – se përmes sakrificës, përulësisë dhe dashurisë, njeriu ngrihet dhe afrohet drejt hyjnores”, thuhet në urimin e presidentes Gordana Siljanovska-Davkova me rastin e festës më të madhe dhe më të shenjtë të krishterë, Ringjallja e Krishtit – Pashkët.

Në kohë trazirash të vështira shoqërore, sfidash të mëdha dhe sfidash të forta morale, porosit ajo, duhet të qëndrojmë të palëkundur në virtyte, të bashkuar rreth vlerave të humanizmit, solidaritetit dhe respektit të ndërsjellë.

“Le t’i hapim zemrat për të afërmit, ta forcojmë kujdesin për të cenueshmit dhe ta zgjojmë frymën e bashkësisë dhe unitetit. Le të na dhurojë drita e Ringjalljes së Krishtit forcë, urtësi dhe besim të palëkundur në të mirën, si parim i përjetshëm i ekzistencës njerëzore. Krishti u ringjall! Me të vërtetë u ringjall!”, thuhet në urimin e presidentes Gordana Siljanovska-Davkova. ls/