Shkup, 14 maj 2026 (MIA) - Ministri i Punëve të Brendshme Pançe Toshkovski theksoi sonte se ai personalisht beson se kryeministri Hristijan Mickoski kurrë nuk do të përfshihej në komunikime të paligjshme ose nuk do të ndikonte te një prokuror që të vepronte në një mënyrë të caktuar.

Toshkovski e theksoi këtë në "Vetëm intervistë" në Kanal 5 kur u pyet për bisedën telefonike të Mickoskit me prokurorin publik Nenad Saveski në lidhje me rastin "Mazuti", për të cilën LSDM-ja opozitare akuzoi se "kryeministri dhe prokurori janë marrë vesh në telefon për rastet dhe rrjedhën e hetimit".

"Duke e njohur personalisht kryeministrin, jam i sigurt se ai kurrë nuk do të hynte në komunikime të caktuara që do të ishin të paligjshme, e lëre më në drejtim të ndikimit të ndonjë prokurori, konkretisht nëse ai duhet të veprojë kështu, ashtu apo nuk e di si. Kryeministri ynë kurrë nuk do ta bënte këtë. Pra, nuk besoj se është bërë ndonjë parregullsi specifike në ndonjë aktivitet që ai ndërmori në drejtim të komunikimit me prokurorin publik. Supozoj se ai donte të merrte informacion origjinal për atë që tronditi të gjithë publikun e Maqedonisë, si personi i parë i Qeverisë, një përfaqësues i qytetarëve të Maqedonisë, me të vërtetë nuk shoh asgjë kontestuese në këtë", tha Toshkoski.

Ai shtoi se në sistem ekzistojnë mekanizma nëse zbulohet se ka ndonjë shkelje të parimeve të punës në Prokurori, duke dhënë shembullin e ish prokurorit Ljubomir Joveski me pezullimin e ish kryetares së Prokurorisë Themelore Publike për Ndjekjen e Krimit të Organizuar dhe Korrupsionit, Vilma Ruskoska.

"Do të shohim se si do të zhvillohet kjo gjë", theksoi Toshkoski.

Ai theksoi se nuk ka të mbrojtur ose të paprekshëm në vend, pavarësisht nga vijnë, nga qeveria apo opozita.

"Edhe kur bëhej fjalë për struktura, le të themi, dhe njerëz që janë të afërt me garniturën qeveritare. Përkundrazi, mendoj se kryeministri dëshiron të japë një shembull se më në fund koha e selektivitetit, pandëshkueshmërisë dhe mbylljes së syve ndaj njerëzve të vet ka mbaruar. Dhe mendoj se me të gjitha ato procedura që kemi zbatuar në periudhën e kaluar, kemi treguar pikërisht këtë. Pavarësisht nëse dikush është një zyrtar i afërt, pavarësisht nëse dikush brenda një njësie të caktuar organizative është i afërt me dikë, pavarësisht nëse është një drejtor që vjen nga radhët e koalicionit në pushtet apo, përsëri, një menaxher i një institucioni të caktuar, mendoj se kemi treguar joselektivitet absolut. Nuk ka të mbrojtur. Jo nga puna e Ministrisë së Punëve të Brendshme. Kjo është arsyeja pse anketat e qytetarëve, të cilat vlerësojnë luftën kundër korrupsionit kur flasim për Ministrinë e Punëve të Brendshme, janë shumë të ndryshme nga kur flasim, për shembull, për Prokurorinë Publike", tha Toshkoski.

Kur u pyet për thirrjen e ish ministrit të Bujqësisë, Ljupço Nikollovski dhe dy personave të tjerë për një bisedë zyrtare në SPB Shkup, pas një kallëzimi penal nga Ministria e Bujqësisë për shpërdorim të detyrës zyrtare, Toshkoski theksoi se nuk dëshiron të hyjë në detaje rreth rasteve që janë nën hetim paraprak.

"Nuk do të doja, si në të gjitha rastet e tjera, veçanërisht në kuadër të hetimit paraprak, të hyja në detaje rreth rasteve. Le t'ua lëmë institucioneve të bëjnë punën e tyre. Por nuk do të pajtohesha që vetëm zyrtarët e qeverisë së mëparshme i nënshtrohen ndjekjes penale. Sidomos jo ata që mashtrojnë qytetarët e Maqedonisë. Dhe siç e kemi treguar në të kaluarën, si gjyqtarët aktualë ashtu edhe drejtorët e institucioneve shëndetësore, institucioneve bujqësore dhe çdo institucioni në vend, mund të jenë subjekt i ndjekjes penale, veçanërisht, do ta përsëris, nëse ata mashtrojnë në emër të qytetarëve të Maqedonisë", tha ai. sa/

Foto: Printskrin