Shtip, 1 janar 2025 (MIA) - Presidentja Gordana Siljanovska Davkova vlerëson se nevojitet një ligj i ri për falje, në fokus të të cilit do të jenë personat e burgosur, sepse mendon se ky aktual nuk është i vendosur sistematikisht.

Ajo ka konfirmuar se është njohur me veprat penale të të disa personave të dënuar të cilët janë falur me rastin e festave të Vitit të Ri.

"Sigurisht që e di. Çështja është në dorën e Komisionit të Faljeve. Më herët ka ardhur një propozim nga Ministria e Drejtësisë, madje jam takuar me ministrin e Drejtësisë. Më kanë përshkruar të gjitha rastet dhe më kanë lënë t'i shpjegoj publikut - kur një person dëgjon falje, mendon se dikush është plotësisht i lirë. Këto falje kryesisht kanë të bëjnë me tre muaj, tha Siljanovska Davkova në pyetjen e gazetarit pas vizitës së pjesëtarëve të ushtrisë në kazermën "Jane Sandanski" në Shtip.

Sipas saj, një nga vërejtjet kryesore të sistemit tonë të faljeve apo uljeve të dënimeve është periudha shumë e shkurtër, pasi siç theksoi ajo, e drejta për falje apo mëshirë është e drejtë e njeriut dhe vlerësohet socializimi apo risocializimi pasi të ndodheni në burg. Ajo që është më e rëndësishme, thotë ajo, gjatë faljes është gjykata.

Sipas presidentes, nevojitet një ligj i ri modern për faljen, në të cilin thelbi do të jenë njerëzit që janë të burgosur.

Lidhur me atë se a duhet të parashikohet një afat më i gjatë se tre muaj për faljen, ajo shton se kjo duhet të propozohet nga hartuesit e autorizuar të ligjeve, por thotë se ndoshta duhet rishqyrtuar vetë politika penale.

Nga kabineti i presidentes dje informuan se me rastin e festave të Vitit të Ri janë falur shtatë persona, njëri prej tyre plotësisht dhe gjashtë pjesërisht. Gjashtë të dënuarit janë falur për një periudhë prej tre muajsh, ndërsa një personi është falur për tre muaj e katër ditë, gjë që ka sjellë lirimin e plotë të tij nga vuajtja e dënimit me burg.

Komisioni i Faljes është pjesë e organeve të presidentes, i cili me propozim të Ministrisë së Drejtësisë vendos se kush dhe çfarë falje do t'u jepet të burgosurve me aktgjykime fuqiplota.

Të gjithë anëtarët e Komisionit të parë për falje, të cilin e themeloi Siljanovska Davkova, dhanë dorëheqje nga pozitat e tyre pas kritikave publike për disa nga emrat në listën e faljes që u publikuan me rastin e festës së 23 tetorit. Përbërja e re e Komisionit është formuar në fund të muajit nëntor, të cilin e drejton dr. Milka Ristova. ls/

Foto: MIA