Seul, 15 prill 2026 (MIA) - Ekonomia e Koresë së Veriut po hyn në një fazë rimëkëmbjeje falë marrëdhënieve me Rusinë dhe Kinën, duke kapërcyer një periudhë recesioni, njoftoi Ministria e Unifikimit në Seul.

Vlerësimi u bë në planin pesëvjeçar për marrëdhëniet ndërkoreane për periudhën 2026-2030, i paraqitur në Komitetin e Punëve të Jashtme dhe Unifikimit të Asamblesë Kombëtare, raporton Jonhap.

Koreja e Veriut ka "vendosur dhe ruajtur një marrëdhënie të ngjashme me aleancën" me Rusinë, duke përfshirë shkëmbimin e armëve të teknologjisë së lartë dhe transferimin e teknologjisë, ndërsa njëkohësisht ndjek një rivendosje praktike të marrëdhënieve me Kinën, një trend që po e çon ekonominë kombëtare drejt rimëkëmbjes, thuhet në kumtesë.

Në të njëjtën kohë, Koreja e Veriut po kërkon të rrisë "autonominë e saj strategjike" dhe "fuqinë negociuese" duke shfrytëzuar rivalitetin midis Kinës dhe SHBA-së, ndërsa forcon diplomacinë me vendet që tradicionalisht janë miqësore me regjimin.

Plani për marrëdhëniet ndërkoreane përgatitet çdo pesë vjet. Edicioni i fundit, i pestë, u përgatit pas planit të mëparshëm të miratuar nga presidenti i rrëzuar Jun Suk-Jol, i cili u ndërpre pas tre vitesh zbatimi.

Si parime themelore, plani i ri rendit citon institucionalizimin e politikës së bashkëjetesës paqësore me Korenë e Veriut të administratës Li Xhe-mjung, krijimin e një baze për rritje të ndërsjellë dhe përpjekjen për një Gadishull Korean pa luftë dhe armë bërthamore. sa/

foto: arkivi