Uashington, 31 janar 2026 (MIA) - Miliarderi Elon Mask ka përdorur rrjetet sociale pasi emri i tij u shfaq në një grup të ri dokumentesh të publikuara që lidhen me autorin e dënuar të krimit seksual Xhefri Epstin, të cilat përfshijnë korrespondencë me email nga viti 2013.

Sipas emaileve të publikuara, Mask shkëmbeu mesazhe me Epstin në dhjetor të vitit 2013 në lidhje me një vizitë të mundshme në ishullin e tij në Karaibe, ndërsa korrespondenca të veçanta tregojnë se Epstin u përpoq të organizonte drekë me Mask në shkurt të atij viti.

Mask deklaroi në X se kishte komunikim shumë të kufizuar me Epstin dhe se ai kishte refuzuar disa ftesa për të vizituar ishullin e tij ose për të udhëtuar me aeroplanin e tij.

Ai vuri në dukje se është i vetëdijshëm se disa nga korrespondencat mund të keqinterpretohen, por se nuk është i shqetësuar. Mask shtoi se mbështeti fuqimisht publikimin e dokumenteve të Epstin dhe theksoi se është e rëndësishme të ndiqen penalisht ata që kanë kryer krime të rënda, veçanërisht në rastet e shfrytëzimit seksual të të miturve.

"Jam i vetëdijshëm se një pjesë e korrespondencës sime me Epstin mund të keqinterpretohet. Askush nuk ka këmbëngulur më shumë se unë për publikimin e dokumenteve të Epstin dhe jam i lumtur që kjo më në fund ka ndodhur",  tha Mask në X. sa/