Shkup, 5 mars 2026 (MIA) - Komisioni parlamentar për Sistem Politik dhe Marrëdhënie Ndërmjet Komuniteteve e ka mbajtur sot seancën e 55-të, në të cilën është diskutuar pika e vetme në rend të ditës, përkatësisht Propozim-ligji për Prokurorinë Publike në lexim të parë.

Këtë herë, Komisioni e përqendroi diskutimin në çështjen e përcaktimit të nevojës për të miratuar zgjidhjen ligjore, përpara se ta shqyrtonte atë në lexim të dytë. Me shumicë votash, Komisioni arriti në përfundimin se zgjidhja ligjore është e pranueshme dhe duhet të jepet në lexim të mëtejshëm.

Votimit i parapriu një prezantim i vetë zgjidhjes ligjore, të cilën në emër të propozuesit e bëri zëvendësministri i Drejtësisë, Alen Dereban, i cili theksoi se ajo është pjesë e axhendës së reformës dhe proceseve në gjyqësor.

Dereban shpjegoi se ligji është rezultat i një procesi gjithëpërfshirës në përgatitjen e të cilit ishin të përfshirë përfaqësues të komunitetit akademik, gjyqësorit, prokurorisë, pushtetit ekzekutiv, organizatave të shoqërisë civile dhe partnerëve ndërkombëtarë. Procesi, siç tha ai, u monitorua në mënyrë aktive nga BE-ja dhe organizatat ndërkombëtare përkatëse, ndërsa teksti i Propozim-ligjit iu dërgua Komisionit të Venecias, së bashku me ligjin për Këshillin e Prokurorisë Publike. Ligji u kthye me një mendim pozitiv me disa rekomandime që u zbatuan plotësisht në Propozim-ligji, përveç atyre që lidhen me nevojën për ndryshime kushtetuese.

Ai theksoi se Propozim-ligji është veçanërisht i rëndësishëm në atë që përcakton një kornizë të qartë për llogaridhënien e prokurorëve publikë pa ndikuar në pavarësinë dhe autonominë e tyre si parime kushtetuese.

Asnjë deputet i opozitës nuk mori pjesë në seancën dëgjimore të Komisionit. Kryetari i Komisionit njoftoi se koalicioni qeverisës do të nisë një iniciativë për të paraqitur një kërkesë zyrtare për të organizuar një seancë dëgjimore publike mbi zgjidhjen ligjore, e cila do të lejonte pjesëmarrjen e sektorit joqeveritar dhe qytetarëve, në mënyrë që ata të mund të jepnin mendimin e tyre në mënyrë që të miratohej një zgjidhje më e mirë ligjore.mb/

Foto: skrinshot