Shkup, 7 maj 2026 (MIA) – Kryetari i Komisionit Rregullator për Energjetikë (KRRE), Aco Ristov, pret që deri në fund të vitit të përfundojnë të gjitha procedurat, në mënyrë që nga fillimi i vitit të ardhshëm prodhuesit e energjisë elektrike nga burimet e ripërtëritshme të mund të marrin pjesë pa pengesa në tregun e përbashkët evropian.

"Si rregullator, ne punojmë çdo ditë në rregullativën ligjore për lidhjen e tregut të Maqedonisë së Veriut të energjisë elektrike me tregun evropian. Deri tani edhe procedurat teknike edhe ato ligjore po zhvillohen mirë, veçanërisht me Ligjin për Energjetikë, në të cilin është parashikuar implementimi i të gjitha rregulloreve evropiane dhe kush e dha iniciativën. Aktualisht po përpunohen të gjitha aktet në shtet për të gjithë pjesëmarrësit, nga operatorët deri te distributorët dhe koneksionet. Presim që deri në fund të këtij viti formalisht ta përfundojmë “detyrën e shtëpisë” lidhur me certifikimin dhe ndarjen e burimeve të ripërtëritshme nga burimet që prodhojnë energji elektrike nga lëndët djegëse fosile, në mënyrë që më në fund të gjithë investitorët vendas dhe të huaj në vend, vitin e ardhshëm, të bëhen pjesëmarrës në tregun e përbashkët evropian", tha Aco Ristov në përgjigje të një pyetjeje pas takimit të sotëm me gazetarët në KRRE.

Tani, siç tha, prodhuesit kanë probleme dhe nuk mund ta plasojnë energjinë elektrike të prodhuar në Evropë.

"Kjo punë ndoshta ka mundur të bëhej edhe më herët, por ndodhi hiperprodhim në ndërtimin e centraleve dhe për tre vjet u ndërtua një numër shumë i madh i tyre. Ndërkohë, rregullativa ligjore sikur po ecën më ngadalë sesa ndërtimi i objekteve energjetike me kapital privat. Ne do të bëjmë përpjekje të bëjmë gjithçka që është në mundësinë tonë për t’i ndihmuar prodhuesit që sa më shpejt të bëhen pjesë e tregut evropian", theksoi Ristov.

Certifikimi dhe metodat e verifikimit dhe konfirmimit të prodhimit përcaktohen nga Ministria e Mjedisit Jetësor dhe Planifikimit Hapësinor dhe nuk janë në kompetencë të KRRE-së. ls/

Foto: MIA