Shkup, 13 mars 2026 (MIA) - Kompania "Okta" ka marrë vendim, duke filluar nga sot dhe deri në fund të marsit, të ulë çmimet e naftës dhe benzinës për dy denarë për tregtarët që blejnë karburant nga kompania, duke u mundësuar kështu shitësve me shumicë dhe pakicë ta reflektojnë këtë përfitim në çmimet përfundimtare për konsumatorët.

Drejtori ekzekutiv i “Okta”-s, Dimitrios Pashos, duke njoftuar vendimin në konferencë për media me ministren e Energjisë, Sanja Bozhinovska sot, tha se u takon shitësve me shumicë dhe pakicë të përcaktojnë në mënyrë të pavarur çmimet e shitjes në përputhje me politikat e tyre tregtare dhe kushtet e tregut.

“Forcimi i furnizimit përmes tubacionit të produkteve ‘Vardaks’ luan rol të rëndësishëm në sigurimin e stabilitetit dhe vazhdimësisë në furnizimin me karburante në të gjithë vendin. Kompania, si kompani me përgjegjësi shoqërore që punon me furnizimin me energji, është e përkushtuar ta përkthejë furnizimin e tillë të forcuar në përfitime të prekshme materiale për konsumatorët finalë. Dhe për këto arsye, nga sot deri në fund të muajit, po prezantojmë zbritje prej dy denarë për litër naftë dhe benzinë ​​për ata tregtarë me shumicë dhe pakicë që blejnë karburante nga ne. Në këtë mënyrë, ne u mundësojmë këtyre tregtarëve ta transferojnë këtë përfitim te konsumatorët. Megjithatë, duhet të theksojmë se tregtarët ruajnë lirinë e tyre për të formuar në mënyrë të pavarur çmimet me pakicë”, shpjegoi Pashos.

Pashos thotë se kanë rezerva të detyrueshme, por edhe rezerva shtesë. Vlerësimet e kompanisë janë se me hapin e tillë ajo jep kontribut të përgjithshëm në mbështetje të tregut në vlerë prej afro dy milionë euro. 

Ministrja Bozhinovska shpreson se tregtarët do të jenë të përgjegjshëm në këto momente krize dhe se do ta shfrytëzojnë përfitimin të cilin e ofron “Okta”.

“Shpresoj që të gjithë do të jenë përgjegjës dhe do të veprojnë në interes të qytetarëve”, tha Bozhinovska.

Siguron që furnizimi me karburant në vend të jetë i qëndrueshëm dhe që kompanitë të kenë rezerva të mjaftueshme. Në përputhje me Rregulloren mbi nivelin dhe metodën dhe llogaritjen e rezervave operative, një tregtar duhet të ketë në çdo kohë rezerva operative të derivateve të naftës dhe karburanteve të transportit për të mbuluar vëllim mesatar pesëditor të tregtisë për secilin derivat të naftës individualisht, të arritur në vitin kalendarik të mëparshëm.

“Në kushte kur çmimet e naftës po rriten në tregjet botërore dhe i gjithë rajoni dhe bota po përballen me presion çmimesh, furnizimi me karburant në Maqedoni është i qëndrueshëm, kompanitë kanë siguruar rezerva, përveç kësaj furnizimi është forcuar përmes tubacionit të produkteve “Vardaks", ndërsa Qeveria po e ndjek nga afër situatën. Nëse presionet globale të çmimeve vazhdojnë, ne jemi të gatshëm të përdorim të gjitha mekanizmat që kemi në dispozicion për të mbrojtur standardin e jetesës së qytetarëve” Bozhinovska.

Lidhur me reagimet se qytetarët po dëmtohen për shkak se çdo të hënë merret vendim për çmimet e reja të karburanteve, edhe pse çmimi në bursat botërore është i ndryshueshëm, ministrja Bozhinovska nuk pajtohet me pretendime të tilla, duke theksuar se që nga fillimi i krizës në vend ka pasur vetëm një rritje të çmimeve, por pavarësisht kësaj kemi çmimet më të ulëta të karburanteve.

“Vendimin e merr Komisioni Rregullator i Energjisë, por unë u interesova dhe më thanë se kjo llogaritje është futur që nga lufta në Ukrainë në vitin 2022, ndërsa më parë ishte në baza javore. Meqenëse ne i monitoronim çmimet, lufta filloi më 28 shkurt, dhe patëm vetëm një rritje, që do të thotë se nëse i shikoni të gjitha çmimet, mendoj se qytetarët nuk dëmtohen. Megjithatë, KRRE është ai që monitoron çmimet dhe ka metodologji çmimesh dhe shpresoj që ata, si ne, të punojnë në interes të qytetarëve” ,tha Bozhinovska.

Sipas të dhënave të Agjencisë për Derivate të Detyrueshme të Naftës, në vend ka 138 milionë e 878 mijë litra “eurodizel”, 32 milionë 098 mijë litra “eurosuper BS-95”, vaji ekstra i lehtë për amvisëri – 10 milionë 772 mijë litra dhe mazut – 5 milionë 287 mijë kilogramë.  fc/

Foto: OKTA