Bruksel, 24 janar 2026 (MIA) - NATO planifikon ta rrisë ndjeshëm armatimin dhe municionet në krahun e saj lindor, si dhe të krijojë zonë të re mbrojtëse të bazuar në teknologji robotike dhe të automatizuara, raportoi DPA.

Masat synojnë forcimin e efektit pengues kundër Rusisë, deklaroi gjenerali i brigadës Tomas Lovin për botimin javor të gazetës gjermane Velt.

Sipas konceptit të ri të mbrojtjes shumështresore, NATO do të përpiqet të ngadalësojë ose ndalojë një kundërshtar të mundshëm në një fazë të hershme duke përdorur sisteme të teknologjisë së lartë.

Do të ndërtohet një zonë përgjatë kufijve të aleancës me Rusinë dhe Bjellorusinë që do të mbështetet shumë në mbikëqyrje, si dhe në sisteme të kontrolluara nga distanca ose gjysmë të automatizuara. Çdo sulmues do të duhet së pari ta kapërcejë këtë zonë përpara se të jetë në gjendje të përparojë më tej.

Lovin, zëvendësshef i shtabit për operacionet në Komandën tokësore të NATO-s në Izmir, shpjegoi se mbikëqyrja e krahut lindor do të kryhet përmes sistemeve të mbledhjes së të dhënave në tokë, në ajër, në hapësirë ​​dhe në hapësirën digjitale. Ky informacion do t'u ofrohet aleatëve në kohë reale. Për këtë qëllim mund të përdoren si asete stacionare ashtu edhe mobile - radarë, sensorë akustikë dhe optikë, si dhe të dhëna nga satelitët, dronët dhe aeroplanët zbulues.

NATO planifikon të krijojë një të ashtuquajtur zonë të nxehtë përgjatë kufijve, detyra e së cilës do të jetë ndalimi ose ngadalësimi i sulmuesve në fazën fillestare. Mund të vendosen dronë të armatosur, automjete luftarake gjysmë-autonome, sisteme robotike dhe asete të automatizuara të mbrojtjes ajrore. Lovin theksoi se njerëzit do të mbajnë rolin kryesor në vendimet mbi përdorimin e forcës, brenda kuadrit të rregullave ndërkombëtare dhe standardeve etike. mb/

Foto: MIA