Bruksel, 5 shkurt 2025 (MIA) - Përfaqësuesi i Bullgarisë në Grupin punues për zgjerim të BE-së më tha se pala bullgare është e gatshme për bisedime dhe po dërgon mesazhe pozitive për vendosjen e dialogut, deklaroi për MIA-n ministri për Çështje Evropiane, Orhan Murtezani i cili nga dje është për vizitë pune dyditore në Bruksel.

"Mendoj se po krijohet një ambient i mirë të cilin duhet ta shfrytëzojmë jo vetëm për të vendosur dialog i cili duhet të ekzistojë mes vendeve fqinje për të ndërtuar marrëdhënie të mira fqinjësore, por edhe hapësirë ​​që do të na çojë drejt një zgjidhje të pranueshme të përbashkët e cila përfundimisht do të na çojë në BE”, theksoi Murtezani.

Dje dhe sot, Murtezani pati takime me kryetarin e Komitetit ekonomik dhe social evropian (EESC), Oliver Ropke, Drejtorin e përgjithshëm të drejtorisë së përgjithshme për zgjerim dhe Fqinjësi lindore (DG ENEST), Gert Jan Kopman, Drejtorin ekzekutiv për Evropën në shërbimin evropian për punë të jashtme (EEAS), si dhe me eurodeputetin kroat, Mati Masikaurs dhe raportuesit Tajs Rojten dhe Matej Tonin.

Në këto takime, sipas Murtezanit, është diskutuar mbi dinamikën e zbatimit të reformave në përgjithësi dhe veçanërisht ato që janë pjesë e Agjendës reformuese në kuadër të Planit të rritjes së Komisionit Evropian për Ballkanin Perëndimor.

"Shfrytëzova rastin për të diskutuar procesin tonë të integrimit. Jemi plotësisht të vetëdijshëm për pengesat para nesh që të hapim negociata për t'u bërë anëtare fuqiplotë në Bashkimin Evropian, siç jemi plotësisht të vetëdijshëm për momentin që dikton se duhet të gjejmë shpejt zgjidhje për të ecur në këtë pjesë të fundit të maratonës 20-vjeçare”, tha Murtezani.

Në takime ai u bëri thirrje të gjithë përfaqësuesve të BE-së se nevojitet një lëvizje nga Brukseli për fillimin e negociatave, duke pasur parasysh se çështja jonë përballet me mosmarrëveshje të gjata dypalëshe.

"Për të ecur përpara me sukses, duhet të ketë jehonë nga Brukseli që do të na sigurojë se çështjet e mëtejshme irracionale bilaterale nuk do të bllokojnë procesin e zhvillimit të negociatave të cilat për qytetarët janë ende prioriteti më i lartë strategjik", shtoi Murtezani.

Në kuadër të vizitës, sot pasdite Murtezani do të takohet me komisaren për zgjerim të BE-së, Marta Kos ku do të diskutohet për krahasimin e agjendës së reformave, si dhe për Samitin e Ballkanit Perëndimor i cili është paraparë të mbahet në Shkup në gjysmën e dytë të marsit.

“Do të diskutojmë edhe për të gjitha procedurat e nevojshme teknike që jemi duke i përfunduar për të qenë të gatshëm formalisht dhe juridikisht për hapjen e negociatave, si dhe të gjitha mënyrat për të vendosur dialogun dhe ajo se si me ndihmën e BE-së mund të arrijmë një zgjidhje të pranueshme reciproke”, shton Murtezani.

Murtezani nesër do të udhëtojë nga Brukseli në Athinë për t'u takuar me përfaqësues të autoriteteve greke me të cilët do të diskutojë për marrëdhëniet bilaterale dhe mbështetjen e Greqisë në rrugën tonë evropiane. Murtezani është anëtari i parë i qeverisë së re që do ta vizitojë Greqinë.

Foto: MIA