Zagreb, 30 prill 2026 (MIA) - Në kuadër të vizitës së tij të punës në Kroaci, ministri i Punëve të Jashtme dhe Tregtisë së Jashtme, Timço Mucunski, u takua me ministrin e Punëve të Jashtme dhe Evropiane të Kroacisë, Gordan Grliq Radman.

Në takim, siç njofton Ministria e Punëve të Jashtme dhe Tregtisë së Jashtme, të dy bashkëbiseduesit ranë dakord se ky takim përfaqëson një konfirmim të dialogut intensiv politik dhe bashkëpunimit konstruktiv që të dy vendet kanë kultivuar për më shumë se tre dekada, dhe po zhvillohet në prag të nënshkrimit të Marrëveshjes ndërqeveritare për bashkëpunim strategjik, e cila bazohet në vlerat evropiane, besimin dhe respektin e ndërsjellë të ndërtuar vazhdimisht.

"Në përputhje me kënaqësinë e shprehur për trendin pozitiv në zhvillimin e marrëdhënieve dypalëshe, u theksua interesi i ndërsjellë për vazhdimin e dialogut politik dhe bashkëpunimit në nivelin më të lartë, me theks të veçantë në promovimin e bashkëpunimit ekonomik, modalitetet për thellimin e shkëmbimit tregtar, si dhe zgjerimin e bashkëpunimit në disa fusha", thuhet në kumtesën e Ministrisë.

Njëkohësisht, siç shtojnë ata, u riafirmua mirënjohja jonë për qëndrimet kroate mbi domosdoshmërinë e vazhdimit të procesit të zgjerimit të Bashkimit Evropian me vendet e Ballkanit Perëndimor, si dhe u shpreh gatishmëria jonë për të përdorur përvojën kroate në rrugën drejt anëtarësimit të plotë në Bashkimin Evropian.

"Ministrat ranë dakord që ruajtja e koordinimit të përforcuar si aleatë brenda NATO-s është një përparësi kryesore e politikës së jashtme, e cila është provuar të jetë një mekanizëm efektiv për harmonizimin e qëndrimeve, forcimin e mirëkuptimit të ndërsjellë dhe rritjen e kontributit në sigurinë rajonale dhe euroatlantike, duke theksuar se të dy vendet mbeten të përkushtuara për të respektuar vlerat dhe parimet e Aleancës", shtohet në kumtesë.

Takimi u shfrytëzua gjithashtu për të shkëmbyer mendime mbi temat aktuale në marrëdhëniet ndërkombëtare, zhvillimet rajonale, si dhe situatat e brendshme politike dhe ekonomike në të dy vendet.

Në një deklaratë për mediat, ministri Mucunski theksoi se me Kroacinë na lidhin marrëdhënie të ngushta, besim, aleancë brenda NATO-s dhe një vizion i përbashkët evropian për rajonin, duke konfirmuar edhe një herë marrëdhëniet tradicionalisht të mira, të bazuara në respekt të ndërsjellë, dialog të hapur dhe bashkëpunim konkret.

Ai theksoi se bisedimet iu kushtuan disa çështjeve nga agjenda dypalëshe, me theks të veçantë nënshkrimit të ardhshëm të marrëveshjes ndërqeveritare për bashkëpunim strategjik, qëllimi i së cilës është të krijojë një kornizë moderne dhe funksionale për bashkëpunim më intensiv, të strukturuar dhe gjithëpërfshirës midis dy vendeve.

Në këtë drejtim, u theksua se marrëveshja duhet të përfaqësojë një instrument praktik për promovimin e bashkëpunimit ekonomik, shkëmbimit institucional, përdorimit të ekspertizës evropiane dhe ofrimit të përfitimeve konkrete për qytetarët. sa/

Foto: MPJTJ