Shkup, 21 prill 2026 (MIA) - Ministri i Punëve të Jashtme dhe Tregtisë së Jashtme, Timço Mucunski, bashkëkryesoi me Forumin Rajonal për Zhvillim të Qëndrueshëm të Komisionit Ekonomik të Kombeve të Bashkuara për Evropë (UNECE), i cili mbahet në Gjenevë. Tema e forumit të këtij viti, siç theksohet në kumtesën nga Ministria e Punëve të Jashtme dhe Tregtisë së Jashtme, është "Transformim i përbashkët: aktivitete inovative dhe juridikepër Qëllimet për zhvillim të qëndrueshëm“.
 
 

Në cilësinë e bashkëkryesuesit, ministri Mucunski e hapi seancën plenare, duke theksuar nevojën për përshpejtimin e zbatimit të Agjendës 2030 në kushte të sfidave globale gjithnjë e më komplekse.

"Me më pak se pesë vjet deri në vitin 2030, pyetja nuk është nëse jemi të përkushtuar, por nëse jemi të gatshëm të veprojmë më shpejt, më mençur dhe së bashku", theksoi Mucunski.

Ai theksoi se për Maqedoninë e Veriut, Qëllimet për zhvillim të qëndrueshëm nuk janë një kornizë abstrakte, por një pjesë integrale e politikave kombëtare, të inkorporuara në Strategjinë Kombëtare për Zhvillim dhe të harmonizuara me Kornizën e ardhshme për bashkëpunim me Kombet e Bashkuara.

Në fjalimin e tij, ministri theksoi se fragmantimi kufizon përparimin dhe se arritja e rezultateve kërkon koordinim midis institucioneve, sektorëve dhe vendeve, si dhe një qasje të integruar që lidh diplomacinë, zhvillimin dhe politikën ekonomike.

"Fragmentimi është armiku i përparimit. Transformimi kërkon koordinim - midis qeverive, midis sektorëve dhe midis vendeve", theksoi Mucunski.

Gjatë pjesëmarrjes dy-ditore, Ministri e konfirmoi angazhimin e Maqedonisë së Veriut ndaj Axhendës 2030, përmes politikave që synojnë transformimin e gjelbër, zhvillimin digjital, forcimin e institucioneve dhe promovimin e bashkëpunimit rajonal dhe shumëpalësh. Brenda sesioneve tematike, u hap edhe një diskutim për nevojën për tregues më gjithëpërfshirës për matjen e progresit, në mënyrë që të pasqyrojnë më mirë mirëqenien, barazinë dhe qëndrueshmërinë.

Forumi bashkoi përfaqësues të nivelit të lartë të Shteteve Anëtare, Kombeve të Bashkuara, organizatave ndërkombëtare, shoqërisë civile, të rinjve dhe sektorit privat dhe përfaqëson një platformë të rëndësishme për shkëmbimin e përvojave dhe praktikave të mira në fusha kyçe, duke përfshirë energjinë e qëndrueshme, qytetet e qëndrueshme, partneritetet për zhvillim, si dhe ujin dhe industrinë, inovacionin dhe infrastrukturën. ls/

Foto: MPJ dhe TJ