Shkup, 12 mars 2026 (MIA) – Ministri i Transformimit Digjital, Stefan Andonovski, zhvilloi takim pune me drejtorin dhe përfaqësues të Agjencisë për Shërbime Mediatike Audio dhe Audiovizuele (ASHMAA), si dhe me përfaqësues të influencuesve dhe krijuesve të përmbajtjeve digjitale, me qëllim hapjen e një dialogu rreth gjendjes së rregullimit të veprimtarisë në këtë sektor, në lidhje me Ligjin për Shërbime Mediatike Audio dhe Audiovizuele.

Në takim, siç theksohet në kumtesën, u theksua se Ministria po i ndjek me kujdes reagimet dhe qëndrimet e krijuesve digjitalë dhe se procesi i hartimit të politikave në këtë fushë do të zhvillohet përmes konsultimeve transparente me të gjitha palët e interesuara. Qëllimi, shtohet më tej, është të sigurohet një rregullore bashkëkohore dhe e balancuar që do të mbështesë zhvillimin e ekonomisë digjitale dhe të industrive kreative, duke respektuar njëkohësisht plotësisht rregulloren e Bashkimit Evropian për këtë çështje.

Pjesëmarrësit ranë dakord se është i nevojshëm një proces i hapur dhe gjithëpërfshirës, ku influencuesit, institucionet dhe rregullatori do të punojnë së bashku për përmirësimin e rregulloreve dhe krijimin e një kuadri të qartë ligjor për përmbajtjet digjitale. Në periudhën e ardhshme, shtohet në kumtesën, do të vazhdojnë konsultimet për shqyrtimin e propozimeve dhe vërejtjeve të shoqatave të krijuesve të përmbajtjeve dhe të palëve të tjera të interesuara.

"Ministria e Transformimit Digjital mbetet e përkushtuar në krijimin e një ekosistemi digjital që nxit inovacion, përgjegjësi dhe besim në hapësirën onlajn", theksohet në kumtesën. ls/
 
 Foto: Ministria e Transformimit Digjital
 
 

Фото: Министерство за дигитална трансформација