Shkup, 19 prill 2026 (MIA) - Kryeministri Hristijan Mickoski tha sot në konferencën për shtyp në Qeveri deklaroi se nuk dëshiron të komentojë për kallëzimet penale të ngritura nga LSDM-ja opozitare dhe se do t'ua lërë organeve kompetente të vendosin për këtë, duke theksuar se është i fokusuar në zhvillimin e vendit dhe përmirësimin e kushteve të jetesës së qytetarëve. Partitë politike, shtoi ai, të cilat jetojnë në botën e tyre të gënjeshtrave po i margjinalizojnë dhe zhgënjejnë gjithnjë e më shumë qytetarët.

"Nuk mund të komentoj më tej. Ua lë organeve të vendosin, supozoj se kallëzimet penale janë ngritur në Prokurori. Do t'ia drejtoni pyetjen Prokurorisë. Nuk do të doja të ndikoja në vendimin e Prokurorisë në asnjë bazë me deklaratën time, ndërsa në lidhje me kallëzimin penal të ngritur nga LSDM-ja, dhe sa i përket disa kompanive që do të duhet të ndjekin udhëheqjen e LSDM-së, mendoj se një lloj sjelljeje dhe nevoje e tillë nga ana jonë nuk ekziston, as nuk është pjesë e karakterit tim, as nuk kam ndonjë qëllim të angazhohem në politikë të tillë të shoubizit. Jam i përqendruar në zhvillimin e shtetit dhe kushte më të mira jetese për qytetarët, duke marrë parasysh kohërat e vështira në të cilat jetojnë, dhe i lë partitë politike që jetojnë në botën e tyre të gënjeshtrave të mbeten aty dhe për fat të keq po bëhen gjithnjë e më të margjinalizuara dhe po i zhgënjejnë qytetarët çdo ditë", u përgjigj Mickoski në pyetjen e një gazetari në lidhje me kallëzimin penal të ngritur nga LSDM-ja, por edhe në lidhje me akuzat për punësimin e një firme private të inteligjencës izraelite për të monitoruar kreun e kësaj partie, Venko Filipçe.

I pyetur për deklaratën e tij se ka një ndjenjë se së shpejti zyrtarë të lartë nga qeveria e mëparshme e LSDM-së, ish-kryeministra, anëtarë të familjeve të tyre, etj., do të përfshihen nga përndjekje të caktuara dhe kallëzimin, i cili u ngrit një ditë më vonë kundër deputetit Blerim Bexheti, i cili e vlerësoi atë si presion, Mickoski theksoi se nuk do të komentonte për akuzat e tij, sepse ka vende ku ai mund të provojë pafajësinë e tij dhe shtoi se të gjithë në vend gëzojnë të drejtën e prezumimit të pafajësisë.

"Dua që gjithnjë e më pak njerëz të dënohen, gjithnjë e më shumë njerëz të punojnë sipas ligjit, të respektojnë ligjet, Kushtetutën e këtij vendi tonë të përbashkët. Për mua, suksesi do të ishte të kishte sa më pak akuza penale kundër ish-zyrtarëve, zyrtarëve aktualë etj. Kështu që nuk munda dhe nuk do të doja të komentoja pretendimet e Bexheti dhe besoj në të drejtën e prezumimit të pafajësisë derisa të provohet e kundërta dhe kjo provohet përmes një procedure gjyqësore deri në formën e prerë të një vendimi gjyqësor. Sa i përket ndjenjave, mendoj se jemi bërë shumë të ndjeshëm këtë periudhë, tani le të përqendrohemi te gjërat reale, kurse gjërat reale janë një luftë pa kompromis kundër krimit dhe korrupsionit dhe punë e palodhur për një të ardhme më të mirë për qytetarët e Maqedonisë", theksoi Mickoski. mb/

Foto: printskrin