Shkup, 23 prill 2026 (MIA) - Kryeministri Hristijan Mickoski në intervistën e sotme në edicionin qendror të lajmeve në televizionin Sitel theksoi se pas zgjedhjeve parlamentare në Bullgari ka biseduar me Rumen Radevin, e ka uruar për fitoren dhe ka theksuar përkushtimin për dialog dhe marrëdhënie të mira fqinjësore.

"Të nesërmen e telefonova Radevin, e përgëzova sepse vullneti i qytetarëve duhet të respektohet, ishte i qartë, i qartë, prandaj i uroj mandat të suksesshëm, dëshiroj marrëdhënie fqinjësore të mira edhe atëherë edhe tani. Ne jemi gjithmonë të gatshëm për dialog, jemi të gatshëm të bisedojmë, të kapërcejmë atë mosmarrëveshje që nuk e di nga ka ardhur, megjithëse qëndrimi i tyre zyrtar është se ka ndonjë propozim që është pranuar nga qeveria e mëparshme dhe se mjafton që ata të thonë se kanë gjetur një zgjidhje, nuk mendoj se kjo është e mjaftueshme, sepse nëse do të ishte e mjaftueshme, do të ishte zgjidhur deri tani, kështu që jam i gatshëm të ulem, të bisedojmë dhe të gjejmë një zgjidhje të qëndrueshme që në planin afatgjatë do të thotë integrimi i Maqedonisë brenda BE-së, një proces nga i cili Bullgaria fqinje do të përfitonte më shumë", tha Mickoski.

Lidhur me atë nëse do të ofrojmë zgjidhje krijuese, Mickoski tha se ata i kanë ofruar vazhdimisht ato për gati dy vjet që kur kanë ardhur në pushtet.

"Ne ofrojmë zgjidhje kreative në mënyrë të vazhdueshme këto dy vite që jemi Qeveri. Vazhdimisht kërkojmë takime, bisedojmë me partnerët tanë në Bruksel. Jemi pak, si të them, në një dilemë, sepse kur kërkojmë përmes partnerëve tanë në Bruksel një takim bilateral, ata thonë se nuk ka nevojë përmes Brukselit, duhet të bisedojmë drejtpërdrejt. Kur themi, mirë atëherë të bisedojmë drejtpërdrejt, ata thonë se ky është propozim evropian. Një gjendje kaotike dhe konfuze, por ajo që duhet ta kuptojmë është se fillimisht duhet ta kryejmë detyrën tonë nga brenda. Kur them detyrë nga brenda, kjo do të thotë t’i realizojmë reformat që lidhen me agjendën reformuese, ta bëjmë Maqedoninë një vend më të mirë për të jetuar. Në këtë drejtim, nga raporti i fundit që pres shumë shpejt të publikohet nga Komisioni Evropian, kemi përparim jashtëzakonisht të madh në realizim. Praktikisht punojmë vazhdimisht me kolegët nga Qeveria për t’i përmbushur ato indikatorë që janë pjesë e listës indikative të përfshirë në planin reformues. Dhe kjo varet nga ne dhe nuk varet nga askush tjetër", theksoi Mickoski.

Ai shtoi se është e domosdoshme të punohet në fushën e reformave, në vend të gjunjëzimit dhe nënshkrimit të fletëve të bardha.

"Nëse mendojmë se me rrugën më të lehtë do të kalojmë duke qenë të nënshtruar, duke u gjunjëzuar dhe duke nënshkruar fletë të bardha, nuk do të arrijmë larg. E di që është e vështirë, ka shumë probleme, e di që durimi po zvogëlohet dhe qytetarët janë të paduruar, gjë që është logjike, kanë kaluar dekada, për fat të keq kanë kaluar shumë elita politike që mandatet e tyre i përfundonin me shumë dyshime për krim, korrupsion, dështim dhe të ngjashme. Por thelbi i punës sonë është pikërisht ky, të zgjidhim problemet, jo të krijojmë të reja. Do të duhet kohë, është e saktë, por unë nuk mund të premtoj se do të pranoj diçka që është në kundërshtim me bindjet e mia dhe me atë në të cilën besoj, sepse mendoj se ajo që bëri qeveria e kaluar përfaqëson kapitullimin më të madh historik që mund t’i bëhej ndonjëherë popullit maqedonas" theksoi ai.

Kryeministri përmendi dy shembuj që sipas tij janë vetëm konfirmim i bllokadave me të cilat përballet shteti. Përkujtoi se me partnerët tanë punuan në hartimin e Planit për Veprim për pakicat dhe se gjithë procesi, me ekspert nga Strasburgu për të drejtat e njeriut, praktikisht i gjithë procesi u zhvillua sipas këshillave të tyre. 

"Një shtet anëtar e bllokoi, përsëri fqinji ynë lindor. Ky Plan Veprimi na është i nevojshëm edhe nëse nesër vendosim të hyjmë në ndryshime kushtetuese, nëse ky dokument nuk miratohet, ne përsëri nuk mund të vazhdojmë me negociatat. Ky është edhe një indikator që kjo nuk është e fundit. Vetëm politikanë që kanë ndjekur politika ekzibicioniste dhe naive mendonin se në atë mënyrë i kanë zgjidhur çështjet. Nuk është kështu. Do t’ju jap edhe një shembull të dytë. Me ftesë të aleatëve tanë strategjikë, SHBA-të, aplikuam për anëtarësim asociativ në iniciativën 'Tre Detet' dhe edhe aty jemi sërish të bllokuar nga Bullgaria. Çështja nuk është naive. Vetëm politikanë naivë dhe të dobët mendojnë se duke nënshkruar një letër të bardhë apo duke u gjunjëzuar do t’i zgjidhin problemet. Nuk është kështu. E dëgjova kryetarin e LSDM-së në këtë studio, thotë 'ne i paskemi provokuar grekët dhe bullgarët'. Nuk kemi bërë asgjë.  Me çfarë i provokojmë? Me ndërtimin e gazsjellësit me Greqinë? Me forcimin e linjave të transmetimit? Me ndërtimin e naftësjellësit që për dy dekada ishte vetëm një tub që ndryshkej, ndërsa tani na lidh rafinerinë me portin e Selanikut? Me zhbllokimin e Korridorit 8 drejt Bullgarisë fqinje dhe modernizimin e pjesës perëndimore? Ne nuk provokojmë askënd. Nuk është provokim nëse luftoni për identitetin dhe qëndrimin tuaj, kjo është një qasje parimore", sqaroi Mickoski. fc/

Foto: Arkivi i MIA-s