Berlin, 29 janar 2026 (MIA) - Kancelari gjerman Fridrih Merci sot deklaroi se Evropa duhet të gjejë një mënyrë për t'u bërë përsëri forcë dominuese në mënyrë që të imponohet në rendin botëror në zhvillim të dominuar nga disa lojtarë të fuqishëm.

 Sipas tij, Evropa do të jetë në gjendje të zbatojë idetë e saj vetëm "nëse ne vetë mësojmë të flasim gjuhën e politikës së fuqisë".

 "Evropa ka qenë forca politike që ka këmbëngulur në sundimin e ligjit si bazë për marrëdhëniet midis shteteve dhe popujve për dekada të tëra", theksoi Merci para deputetëve gjermanë.

 Ai u përqendrua  edhe në përpjekjen e presidentit amerikan Donald Tramp për të marrë kontrollin mbi Grenlandën dhe vlerësoi përgjigjen e bashkuar të aleatëve evropianë në NATO.

 Trampi ka hedhur poshtë kërcënimet për të vendosur tarifa në mosmarrëveshjen ose edhe për të përvetësuar territorin në pronësi të Danimarkës me forcë, pasi kombet evropiane kërcënuan me kundër-tarifa.

 "Kjo përvojë u lejoi shkurtimisht evropianëve të ndjenin gëzimin e vetërespektit", tha Merci, duke shtuar se "ky vetëbesim i rigjetur" tani duhet të përdoret për të përballur probleme të mëtejshme.

 Foto: EPA