Paris, 18 nëntor 2025 (MIA) - Gazeta franceze "Le Mond" raportoi se në kuadër të Komisionit Evropian po zhvillohet një luftë e ashpër për kontroll mbi diplomacinë evropiane, e krahasueshme me intrigat e serialit "Loja e Fronëve". Sipas gazetës, kryetarja e Komisionit Evropian, Ursula fon der Lajeni, po përqendron gjithnjë e më shumë fuqinë në duart e saj, duke shtypur shërbimin diplomatik të udhëhequr nga shefja e diplomacisë evropiane, estonezja Kaja Kallas.

"Ursula fon der Lajeni po përqendron gjithnjë e më shumë fuqi në dëm të shërbimit diplomatik, i cili tani po vepron në mënyrë të izoluar", potencon gazeta franceze, duke treguar se marrëdhëniet e brendshme midis dy funksionarëve po zhvillohen drejt një përplasjeje serioze. 

 Që nga marrja e detyrës në fund të vitit 2024, Kaja Kallasi është përpjekur të fitojë më shumë ndikim dhe të dalë nga hija e Fon der Lajenit, e cila, siç theksohet vetë po merr iniciativë për çështjet kryesore diplomatike dhe të sigurisë. "Le Mond" vlerëson se konkurrenca për kontrollin e diplomacisë evropiane në kuadër të Komisionit është "e denjë për Loja e Fronëve".

 Fon der Lajeni deklaroi së fundmi se Ukraina rrezikon të jetë në një "bllokadë ekonomike" vitin e ardhshëm për shkak rritjes së shpenzimeve për vazhdimin e konfliktit të armatosur, që vetëm sa e forcoi më tej përshtypjen se kryetarja e Komisionit mban fjalën kryesore në vendimet e politikës së jashtme evropiane.

Përplasja e kompetencave dhe ndikimit midis Fon der Lajenit dhe Kallasit, siç shkruan gazeta, po bëhet një nga çështjet kryesore në funksionimin e brendshëm të BE-së, në një moment kur diplomacia evropiane po përballet me sfida të mëdha - nga kriza ukrainase deri te tensionet globale në rritje. 

Foto: Arkivi i MIA-s