Shkup, 26 mars 2026 (MIA) - Rindërtimi i konvikteve studentore "Stiv Naumov" dhe "Kuzman Josifovski-Pitu" në Shkup është drejt përfundimit, dhe studentët do të fillojnë të akomodohen në to nga viti i ri akademik 2026/2027.

"Nga 1 tetori pres që studentët të vendosen në konviktet e rindërtuara studentore "Stiv Naumov" dhe "Kuzman Josifovski-Pitu", ndërsa më së voni deri në shtator pres që të fillojmë rindërtimin dhe rinovimin e të gjitha konvikteve të tjera studentore në Maqedoni", tha sot ministrja e Arsimit dhe Shkencës Vesna Janevska, duke u përgjigjur në pyetjet gazetareske pas hapjes së konferencës rajonale për arsimin e lartë, e cila mbahet sot dhe nesër në Shkup nën patronazhin e Ministrisë së Arsimit dhe Shkencës.

Me një kredi nga Banka Gjermane për Zhvillim dhe një grant përmes Programit për efikasitet energjetik rajonal për Ballkanin Perëndimor të Bashkimit Evropian, është planifikuar një rinovim i plotë i nëntë konvikteve shtetërore të studentëve në Shkup, Prilep, Manastir, Shtip dhe Ohër.

Rindërtimi i konvikteve shtetërore studentore është pjesë e projektit për rehabilitimin e tyre me efikasitet energjetik dhe do të zhvillohet në faza. Në fazën e parë, po rinovohen konviktet "Stiv Naumov" dhe "Kuzman Josifovski-Pitu" në Shkup, për të cilat është nënshkruar një kontratë me kompaninë "Strabag AG", e cila po kryen aktivitetet e ndërtimit. sa/

Foto: MIA arkivi