Guteresh bëri thirrje për masa emergjente globale për përballje me katastrofën klimatike
- Sekretari i Përgjithshëm i Kombeve të Bashkuara, Antonio Guteresh, sot bëri thirrje për masa emergjente globale për situatën katastrofike të shkaktuar nga ndryshimet klimatike. Thirrja u bë gjatë vizitës së tij në Tonga, ku mori pjesë në Forumin e Shteteve të Paqësorit, transmeton DPA.
![Guteresh bëri thirrje për masa emergjente globale për përballje me katastrofën klimatike](https://mia.mk/images/20240827214825_big_730x400_50.webp )
Nukualofa, 27 gusht 2024 (MIA) - Sekretari i Përgjithshëm i Kombeve të Bashkuara, Antonio Guteresh, sot bëri thirrje për masa emergjente globale për situatën katastrofike të shkaktuar nga ndryshimet klimatike. Thirrja u bë gjatë vizitës së tij në Tonga, ku mori pjesë në Forumin e Shteteve të Paqësorit, transmeton DPA.
Vizita e Guterres përkon me publikimin e raportit të ri nga Organizata Botërore Meteorologjike (OBM), në të cilin theksohet se rajoni është i ekspozuar ndaj një "kërcënimi të trefishtë" - rritja e nivelit të detit, ngrohja e oqeanit dhe rritja e aciditetit të ujërave të oqeanit.
"Kjo është një situatë jonormale: rritja e nivelit të oqeaneve është një krizë tërësisht e krijuar nga njeriu, një krizë që së shpejti do të arrijë kufijtë e pashmangshëm, pa asnjë varkë shpëtimi që të na kthejë në siguri," deklaroi Guteres në Nukualofa, kryeqyteti i Tonga.
Në jugperëndim të Oqeanit Paqësor, ku ndodhet Tonga dhe shumë vende të tjera ishullore, nivelet e deteve janë rritur mbi mesataren globale dhe temperaturat e ujit janë rritur tre herë më shpejt se mesatarja globale që nga viti 1980, thuhet në raportin e OBM-së. Për më tepër, përqendrimi më i lartë i dioksidit të karbonit në oqeane çon në shkatërrimin e shkëmbinjve koralorë dhe dëmton jetën detare.
Guteresh i përshkroi këto të dhëna si një sinjal për masa emergjente në rast fatkeqësie. "Një katastrofë botërore kërcënon këtë parajsë të Paqësorit", deklaroi ai. “Niveli botëror i oqeaneve po rritet me një ritëm të paparë. Oqeani vërshon", shtoi ai. “Arsyeja është e qartë: gazrat serë, të krijuara kryesisht nga djegia e lëndëve djegëse fosile”, theksoi Guteresh.
Edhe pse ata kontribuojnë vetëm me 0,02 për qind të emetimeve globale, ishujt e Paqësorit janë veçanërisht të ekspozuar ndaj efekteve të ndryshimeve klimatike, sepse lartësia mesatare e tyre është vetëm një deri në dy metra mbi nivelin e detit. Rreth 90 për qind e popullsisë jeton brenda një rrezeje prej 5 kilometrash nga bregu dhe gjysma e infrastrukturës ndodhet jo më shumë se 500 metra nga bregu i detit", shtoi Guteresh.
"Rritja e nivelit të detit na prek të gjithëve, duke dëmtuar peshkimin, turizmin dhe ekonominë blu. Në nivel global, rreth një miliard njerëz jetojnë në zonat bregdetare që kërcënohen nga rritja e nivelit të oqeanit, tha Guteresh, duke shtuar se ndërsa rritja e nivelit të oqeaneve është e pashmangshme, vendimet që merren do të përcaktojnë shkallën, shpejtësinë dhe madhësinë e pasojave nga kjo.
Guteresh i përsëriti thirrjet e tij për të kufizuar në mënyrë drastike emetimet e gazrave serrë dhe për të rritur investimet për t'iu përshtatur ndryshimeve klimatike. ls/
Foto: EPA