Shkup, 11 maj 2026 (MIA) - Grupi punues për reforma në legjislacionin zgjedhor sot mbajti seancën e katërt, në të cilën vazhdoi shqyrtimin e rekomandimeve për përparimin e Kodit Zgjedhor, në përputhje me rekomandimet e OSBE/ODIHR dhe detyrimet e parashikuara në Agjendën e Reformave, njoftoi Ministria e Drejtësisë.

Lidhur me pjesëmarrjen e LSDM-së, nga Ministria theksojnë se ende nuk është dorëzuar një njoftim zyrtar me shkrim për tërheqjen e tyre nga procesi. Në këtë drejtim, u shpreh pritja që partia do të rishqyrtojë qëndrimin e saj dhe do të vazhdojë të marrë pjesë në punën e grupit, në mënyrë që reformat në legjislacionin zgjedhor të kryhen përmes një dialogu të gjerë politik dhe institucional, në interes të proceseve demokratike dhe besimit në sistemin zgjedhor.

 Në seancë janë shqyrtuar rekomandimet për të cilat u ra dakord dhe u pranuan me konsensus nga anëtarët e pranishëm të Grupit të punës. Anëtarëve do t'u dorëzohet edhe raporti përfundimtar i OSBE/ODIHR për zgjedhjet lokale të vitit 2025, i cili përmban rekomandime për përparimin e mëtejshëm të rregullores dhe praktikave zgjedhore në zbatimin e zgjedhjeve.

 Nga Ministria theksojnë se një pjesë e konsiderueshme e rekomandimeve përsëriten nga ciklet e mëparshme zgjedhore,  që konfirmon nevojën për implementimin e tyre sistematik.

Ministri i Drejtësisë Igor Fillkov informoi edhe për takimet e zhvilluara me KSHZ-në, ASHMAA, KSHPK-në, përfaqësuesit e sektorit civil, Entin Shtetëror për Revizion dhe OSBE/ODIHR, nga të cilat u paraqitën mendime dhe rekomandime shtesë që do të jenë objekt shqyrtimi në seancat e ardhshme.

"Procesi do të vazhdojë të zhvillohet në mënyrë gjithëpërfshirëse dhe përmes dialogut midis partive politike, institucioneve dhe palëve të interesuara, me qëllim sigurimin e zgjidhjeve ligjore të harmonizuara me standardet demokratike ndërkombëtare", thonë nga Ministria e Drejtësisë.

 Foto: Ministria e Drejtësisë