Shkup, 7 mars 2026 (MIA) – Rreth tre milionë euro do të parashohë Qyteti i Shkupit në fazën e parë të ndërtimit të parkingjeve montuese, por prioritet do të kenë dy parkingjet montuese në kompleksin e klinikave “Nëna Tereza”. Çmimet e parkingut në Qendrën Klinike do të mbeten të njëjta në periudhën e ardhshme, ndërsa pasi të ndërtohen parkingjet montuese do të përcaktohet për pozitat shtesë rregullore e re, por kjo nuk do të nënkuptojë rritje të çmimeve, por konfirmim të marrëdhënieve në lidhje me pagesën, tha kryetari Orce Gjorgjievski. 

Në konferencën për media, pas nënshkrimit të Marrëveshjes me Ministrinë e Shëndetësisë për ndërtimin e parkingjeve në kompleksin e klinikave “Nëna Tereza”, Gjorgjievski theksoi se Qyteti parash mjete për parkingje montuese edhe në Aerodrom, Kapishtec, Kisella Vodë, si dhe në shumë vende të tjera. 

“Në fazën e parë, do të sigurojmë mjete të caktuara për garazhe montuese, dhe prioritet do të jenë parkingjet në Klinikë, por nuk e përjashtoj mundësinë që të shpallet edhe një procedurë për ndërtimin e parkingjeve në lokacione të tjera, theksoi kryetari, duke u përgjigjur në pyetje të gazetarëve. E di që gjithçka është bërë më e shtrenjtë vitet e fundit, shumë më thanë kur u bëra kryetar se duhet t'i rrisim çmimet, por unë u zgjodha nga qytetarët, duhet të bëj një vlerësim real të gjendjes financiare dhe mundësive të qytetarëve. Nuk jam për rritjen e çmimeve tani, as nuk kam premtuar, as nuk do të bëj diçka të tillë. Çmimet për parkim në Klinikë do të mbeten të njëjta, nuk do të ndryshojnë. Kemi futur grupe të reja - pacientë onkologjikë të cilëve u premtuam shtesë dhe ata do t'i përdorin shërbimet falas. Për qytetarë të caktuar që kanë diagnoza të caktuara, do të ketë përjashtim të plotë”, theksoi kryetari i Shkupit.

Ai është i prerë se është shumë me rëndësi të pastrohet hyrja nga veturat në Qendrën Klinike. 

“Nëse nuk e lirojmë hyrjen me automjete të parkuara anash që pengojnë Ndihmën e shpejtë të lëvizë dhe daljen e Spitalit, besoj se nuk e kemi përfunduar punën siç duhet. Pas ndërtimit të dy parkingjeve, do të jemi gati të ndërhyjmë menjëherë me një parking të tretë, por këtë do ta tregojë vlerësimi pas përdorimit të dy parkingjeve. Nuk dua të investoj pa nevojë në Klinikë, nëse mund të ndërhyjmë diku tjetër”, tha Gjorgjievski.

Hapësira te ish spitali modular në kuadër të Qendrës Klinike, është një nga opsionet në perspektivë për parking eventual të tretë montues. Në ndërkohë, ajo hapësirë, tha Gjorgjievski do të rregullohet dhe shtrohet me pllaka. 

“Gjatë katër viteve të fundit, në Shkup ka pasur kaos të plotë, nuk ka pasur asnjë rend në asnjë kuptim dhe në asnjë pjesë të funksionimit të qytetit. Disa biznese veprojnë në të gjitha shkollat ​​e mesme - ato drejtohen nga njerëz dhe ata ia ripërdorin atë palëve të treta pa pasur marrëveshje me Qytetin e Shkupit ose shkollat. Situata ishte e njëjtë kudo, qoftë nga inati, nga injoranca e çështjes apo nga indiferenca e plotë në proces, institucionet e tjera që shqyrtojnë dokumentacionin për këto procedura duhet ta përcaktojnë, unë nuk jam organ që duhet ta përcaktojë këtë, ka organe që mbledhin paga nga njerëzit për këtë, por dikush më në fund duhet të mbajë përgjegjësi. Unë jam kryetar për pak më shumë se 100 ditë dhe po bëjmë hap serioz për të zgjidhur situatën këtu, hap që askush nuk e ka bërë në 40 vjet në Shkup, dhe kam trashëguar një buxhet me një vrimë prej 300 milionë eurosh, ndërmarrje publike plotësisht të shkatërruara. Nëse i kushtoni fokus të fortë, bëni përpjekje maksimale dhe punoni me ekip të mirë, nëse organizoni marrëdhënie dhe keni komunikim normal me të gjitha institucionet, rezultatet mund të arrihen dhe ato janë të dukshme”, nënvizoi kryetari.

Ai edhe një herë tha se në shkolla po bëhen rivlerësime të reja. 

“Kemi konstatuar se po humbasim rreth një milion euro sepse nuk kemi kontrata për qira të objekteve, këto janë mjete serioze, kaq kushton ndërtimi i një shkolle, duhet të ndërtojmë një shkollë gastronomike. Dikush e humbi mundësinë, për arsye të pakuptueshme për mua, ta bënte këtë vite më parë. Jam absolutisht i vetëdijshëm se asgjë nuk fillon me mua, pozicioni im është kalimtar, por tani kam mundësi të vendos rend në këtë sistem dhe do ta vendos. A do të jetë gjithmonë i thjeshtë dhe i shpejtë, jo, nevojiten procedura. Në të kaluarën, askush nuk arriti një marrëveshje të tillë sepse kishte qëllime të tjera - të shkatërronte diçka për t'ia dhënë një investitori privat, në mënyrë që dikush të përfitojë në kurriz të qytetarëve. Është koha të ndryshohet ai sistem i ushtrimit të pushtetit”, tha Gjorgjievski. fc/

Foto: MIA