Shkup, 13 maj 2026 (MIA) – Shefi i Shtatmadhorisë së Armatës, gjeneral-major Sashko Lafçiski, i cili po qëndron në vizitë zyrtare në Forcat e Armatosura të Republikës së Shqipërisë në Tiranë, ka zhvilluar takime në nivelin më të lartë ushtarak dhe shtetëror, ku është diskutuar për avancimin e mëtejshëm të bashkëpunimit ndërmjet ushtrive.

Siç theksohet në kumtesën nga Zyra për marrëdhënie me publikun të Shtatmadhorisë së Armatës, gjatë vizitës, gjenerali Lafçiski ka realizuar takim me presidentin e Shqipërisë, Bajram Begaj, ku është diskutuar për situatën e sigurisë në rajon, bashkëpunimin aleat dhe sfidat e përbashkëta në mjedisin bashkëkohor të sigurisë.

Njëherit u theksua edhe bashkëpunimi i vazhdueshëm i mirë dypalësh midis Ushtrisë dhe Forcave të Armatosura të Shqipërisë, veçanërisht në fushën e stërvitjeve të përbashkëta, ushtrimeve dhe pjesëmarrjes në aktivitete rajonale dhe të NATO-s, që përfaqëson një kontribut të rëndësishëm në sigurinë rajonale dhe kolektive.

Pasi u prit me nderime të larta ushtarake në Shtatmadhorinë e Forcave të Armatosura dhe Ministrinë e Mbrojtjes së Republikës së Shqipërisë, Gjenerali Lafçiski pati takime të veçanta me nikoqirin e tij, Shefin e Shtatmadhorisë së Forcave të Armatosura të Republikës së Shqipërisë, Gjeneral-nënkoloneli Arben Kinxhi, dhe me Ministrin e Mbrojtjes, Ermal Nufi.

Në takimin ndërmjet shefave të shtatmadhorive u trajtuan disa çështje, duke përfshirë promovimin e bashkëpunimit ushtarak përmes zbatimit të aktiviteteve të përbashkëta, trajnimeve dhe ushtrimeve, pjesëmarrjen në operacione ndërkombëtare, sfidat aktuale të sigurisë, si dhe mundësitë për shfrytëzimin e kapaciteteve në dispozicion të dy ushtrive dhe bashkëpunimin e ndërsjellë gjatë përballjes me krizat. 

Bashkëpunimi i ndërsjellë ushtarak dhe promovimi i tij, si një faktor i rëndësishëm për sigurinë rajonale dhe kolektive, ishin gjithashtu temë diskutimi në takimin midis gjeneral Lafçiski dhe ministrit të Mbrojtjes, Ermal Nufi.

"Gjatë bisedimeve u theksua rëndësia e bashkëpunimit midis dy ushtrive në forcimin e stabilitetit dhe sigurisë në rajon, si dhe kontributi i tyre brenda NATO-s. Më pas u konfirmua angazhimi i përbashkët për të përmirësuar vazhdimisht bashkëpunimin ushtarak dypalësh", theksohet në kumtesën. 

Delegacioni i ushtrisë e vizitoi gjithashtu Regjimentin e Operacioneve Speciale të Forcave të Armatosura të Republikës së Shqipërisë, ku u njohën me misionin, detyrat dhe aftësitë e njësisë, si dhe u zhvillua një demonstrim i disa prej kapaciteteve të tyre operative. 

"Ushtria ka zhvilluar bashkëpunim të mirë dypalësh me Forcat e Armatosura të Republikës së Shqipërisë, i cili është më i theksuar në arsimin ushtarak, trajnimin dhe stërvitjet, si në plan dypalësh, ashtu edhe në kuadër të Kartës së Adriatikut, Forumit të Shtatmadhorive të armatave të vendeve të Ballkanit dhe procesit SEDM. Vizita në Forcat e Armatosura të Republikës së Shqipërisë paraqet një mundësi të shkëlqyer për avancimin e bashkëpunimit ndërmjet dy ushtrive", theksohet në kumtesën. ls/

Foto: Zyra për marrëdhënie me publikun e Shtatmadhorisë së Armatës