Shkup, 16 prill 2026 (MIA) - Enti Shtetëror për Revizion sot publikoi raportin përfundimtar të revizionit për revizionin e kryer të raporteve financiare dhe revizionin e pajtueshmërisë së Agjencisë së Kadastrës së patundshmërive për vitin 2024, për llogarinë e buxhetit bazë 637 dhe llogarinë e buxhetit nga aktivitetet vetëfinancuese 787.

Si dobësi sistemike e konstatuar, Enti Shtetëror për Revizion thekson se nuk janë ndarë numra identifikues për organet shtetërore dhe personat juridikë të themeluar nga shteti, për shkak të pamundësisë së ministrisë kompetente për t’i përfshirë ato në evidencën e saj.

Në gjetjet kryesore të konstatuara theksohet se shpenzimet për restaurimin e një objekti ndërtimor nuk janë paraqitur si investime në proces, dhe se një inventar i fondeve dhe burimeve të tyre nuk është kryer plotësisht. Gjithashtu, detyrimet ndaj furnitorëve janë paraqitur në një shumë më të ulët, ndërsa për të ardhurat nga tarifat e paguara përmes terminaleve POS, të cilat një bankë tregtare i transferon në llogarinë e Agjencisë, nuk ekziston lidhje sipas numrave individualë të arkivit në varësi të llojit të shërbimit kadastral të kryer.

"Ekzistojnë parregullsi në angazhimin e personave me kontratë në vepër, pjesë e lëndëve për shërbimet e kryera për dhënien e të dhënave dhe kryerjen e ndryshimeve në Sistemin gjeodezik-kadastral informativ nuk janë plotësisht të kompletuara, ndërsa një pjesë e dokumentacionit nuk është e konfirmuar me nënshkrim/nënshkrim elektronik, si dhe ka dobësi në zbatimin e prokurimeve publike", thuhet në gjetjet e revizionit. qa/